الورث
حصرى.. مشيره محمد
أتسمرت في مكاني، والدموع اتجمعت في عيني.. بابا كان حاسس! بابا كان فاهم شريف أكتر مني!
– “الحاج عمل إيه بقا؟” الأستاذ فتحي كمل بثبات:
– “الحاج توفيق أخد الـ 45 مليون جنيه دول، واشترى بيهم أصول واستثمارات مغلقة باسم ‘وقف خيري وعائلي محمي قانونياً’.. وأسس صندوق استثماري مغلق في البنك، باسمك أنتِ فقط يا شرين.. لكن بشروط صارمة جداً لا يمكن اختراقها!”
– “شروط إيه يا أستاذ فتحي؟”
– “أولاً: لا يجوز التصرف في أصل المبلغ نهائياً، ولا يسحب منه جنيه واحد كاش! الأصل يفضل محفوض ومستثمر في أذون خزينة وعقارات إدارية مؤجرة.
ثانياً: العائد والربح الشهري من الاستثمارات دي هينزل في حساب بنكي باسمك أنتِ شخصياً، لا يحق لأي طرف تاني الإطلاع عليه أو السحب منه إلا بتوقيعك أنتِ وحضورك بشخصك.
ثالثاً – وده الشرف والأهم – الحاج توفيق كتب بند صريح في الوصية والعقود: ‘إذا تم استخدام أي جزء من عائد التركة في سداد ديون شخصية لأطراف خارجية أو شراء عقارات لأشخاص لا يحملون صلة قرابة من الدرجة الأولى (يعني مش أبنائك أنتِ)، يتم تجميد العائد فوراً وتحويله بالكامل لجمعيات الأيتام ومستشفى السرطان لمدة 5 سنوات متتالية!'”
أنا بقيت قاعدة مش قادرة أنطق!
بابا حط قفل فولاذي على الفلوس! حمايتها من أي محاولة استغلال، وحماني أنا شخصياً من إن أي حد يضغط عليا عشان ينصب عليا أو ياخد فلوسي!
– “طب والبيت يا أستاذ فتحي؟ الشقة والعمارة؟”
– “العمارة مكتوبة باسمك بعقد بيع وشراء ونفاذ من زمان، لكن حق الانتفاع والإيجارات بتاعته داخله ضمن الصندوق الخيري.. يعني من الآخر يا شرين، أنتِ هيدخلِك مرتب شهري ثابت محترم جداً يعيشك ملكة أنتِ وولادك، لكن مفيش ‘مليارات كاش’ تحت الإيد، ومفيش سيولة يتوزع منها هدايا وعماير وملايين للناس!”
سكتت لحظة، وبعدين ابتسمت ابتسامة خفيفة وسط دموعي.. ابتسامة فخر بأبويا اللي حماني حتى بعد ما فارق الحياة.
– “الأستاذ شريف عارف حاجة عن الشروط دي يا بنتي؟”
– “ولا يعرف كلمة واحدة يا أستاذ فتحي.. هو متوقع إن بكره هيستلم شيك بـ 20 مليون جنيه ويوزع منه على أمه وأخته ويستقيل من شغله!”
ضحك الأستاذ فتحي ضحكة خفيفة وقال:
– “يبقى يسعدني أقولك إن الصدمة هتكون شديدة عليه.. والورق ده معايا، وده كارتي، ولو حاول يضغط عليكي بكلمة واحدة، خليه يكلمني وأنا هشرحله القانون والوصية بأسلوبي!”
