كنت فى الشهر التامن.. روايات_مشيره_محمد
حصرى روايات_مشيره_محمد
اللواء صلاح رفع سماعة تليفونه وطلب الأمن:
— “أفندم.. نزلوا قوة حراسة فوراً أمام الأوضة 304، ويتم التحفظ على الأستاذ طارق والأستاذة شهيرة لحين وصول الشرطة العسكرية والمباحث المالية.”
في اللحظة دي، طارق انهار، وشهيرة كانت هتتجنن وصرخت فيه:
— “يا غبي! ضيعتني معاك! أنا حطيت شقى عمري في المناقصة دي عشان الخاتم والشو اللي عملته ده!”
الأمن دخل وسحبهم بره الأوضة وهما بيتخانقوا وصوتهم جاب آخر الممر، وطارق عينه عليا وبيصرخ:
— “مش هسيبك يا مريم! الفلوس دي حقي! الظرف اللي جالك من السفير ده بتاعي أنا كمان!”
ابتسمت بمرارة والباب بيتقفل.. “الفلوس دي حقي!”.. الكلمة دي بالذات كانت هي المفتاح اللي حللي كل الألغاز اللي فاتت.
بعد ما اللواء صلاح اطمن عليا واستأذن عشان يتابع التحقيقات، قعدت على السرير ودموعي نزلت.. مش حزناً على طارق، ولكن من كمية الغدر والغل اللي كانوا متحوطة بيهم وأنا مش حاسة.
مسكت تليفوني وطلبت رقم المحامي الخاص بعيلتي، الأستاذ سامح.
— “ألّو.. أيوا يا أستاذ سامح.. أنا مريم.”
— “أهلاً يا سيادة العقيد! ألف مبروك المولد الجديدة، وألف مبروك الترقية.. خير يا فندم، صوتك ماله؟”
— “سامح.. طارق عرف بموضوع ورث جدي بتاع الـ 20 مليون دولار.”
سامح سكت لحظة واستغرب:
— “عرف إزاي؟! الظرف البنكي والإعلام الشرعي كانوا مبعوثين على مكتبنا، وأنا بعتلك النسخة للبيت في ظرف مغلق ومكتوب عليه ‘خاص ومكتوم’!”
نهدت بوجع وقلتله:
— “فتح الظرف من ورايا من تلات شهور.. ومن ساعتها وهو بيتكتك.”
— “طب واكتشفتي إيه تاني يا مريم؟”
بدأت أجمع الخيوط في دماغي وأنا بتكلم:
— “من تلات شهور، طارق فجأة بقى مهتم يغير نشاط شركته اللوجستية ويبرم عقود مع شركات أوفشور في دبي وإستونيا.. وكان كل شوية يطلب مني أوقع على أوراق محسبتهاش مهمة، بصفته جوزي وعنده توكيل إدارة محدد للشركات اللوجستية الخاصة بينا.. تفتكر عمل إيه؟”
أستاذ سامح صوته اتغير وبقى جاد جداً:
— “مريم.. اديني ساعة واحدة، هعمل كشف حسابات وشبكة تقصي على أرقام حسابتكم والتوكيلات اللي معاه، وهرد عليكِ فوراً.. ما تقلقيش، القضايا دي لعبتي.”
قفلت مع سامح، وبصيت لبنتي “نور” اللي كانت نايمة في سريرها الصغير جنب السرير بتاعي.. وشها كان ملاكي، وابتسامة خفيفة على شفايفها الصغيرة. حطيت إيدي على رأسها وقلت في سري:
