اتهــــــــام

ـ أهم حاجة عندي إن البيبي ييجي بخير بنت أو ولد كله رزق من ربنا

لكن هي ردت بحدة

ـ الكلام سهل يا بنتي بس الرجالة ليهم حسابات تانية

لما حكيت الكلام للضابطة رفعت عينيها وقالت

ـ حماتك كانت عارفة إنك هتولدي في المستشفى ده

ـ أيوه هي اللي رشحتهولي من البداية

أحمد بصلي فجأة

ـ إنتي بتقولي إيه يا منى أمي ملهاش علاقة بالموضوع

بصيتله وقلت

ـ أنا ما اتهمتش أمك أنا بحكي اللي حصل

الضابطة قالت

ـ محدش اتهم حد لحد دلوقتي لكن كل شخص له علاقة بالموضوع لازم نسمع أقواله

بعدها طلبوا مننا نسلم الطفلة للفحص الطبي المؤقت مع وجود رانيا وموافقتنا لحد ما تظهر النتائج

كنت بعيط وأنا بسلمها للممرضة

رانيا قربت مني وحطت إيدها على كتفي

ـ متخافيش يا منى هنلاقي بنتك

بصيتلها وقلت

ـ وأنا كمان هدعيلك تلاقي بنتك

وفي اللحظة دي حسيت إننا بقينا أم واحدة بتدور على بنتها وأم تانية بتدور على بنتها والاتنين اتسرق منهم أغلى حاجة في حياتهم

بعد ساعات من الانتظار جت الضابطة نهى ومعاها ملف

قالت إن تسجيلات الكاميرات أظهرت حاجة غريبة

فيه شخص دخل قسم الأطفال في وقت كانت فيه سارة مسؤولة عن نقل الأطفال بين الغرف

الشخص ده كان لابس زي التمريض ووشه متغطي بالكمامة لكن الكاميرا سجلت إنه خرج بعد حوالي عشر دقايق من غير ما يكون معاه أي طفل

والأغرب إن سجل الحضانة اتعدل بعد الواقعة

اسم طفلة اتشال من القائمة واسم طفلة تانية اتحط مكانه

لكن مفيش تسجيل واضح يبين مين الشخص اللي دخل

الضابطة قالت

ـ إحنا دلوقتي بندور على سارة وعلى الشخص اللي ظهر في التسجيلات وطلبنا فحص كل السجلات الطبية ومش هنستبعد أي احتمال

أحمد كان قاعد جنبي ووشه شاحب

فجأة قال

ـ منى أنا آسف

بصيتله باستغراب

دي أول مرة أسمع منه الكلمة دي من سنين

قال وهو بيحاول يمسك إيدي

ـ أنا غلطت لما شكيت فيكي

سحبت إيدي بهدوء

ـ إنت مش غلطت بس يا أحمد إنت جرحتني في أكتر وقت كنت محتاجة فيه أحس إنك ضهري وسندي

نزل راسه وقال

ـ أنا عارف

ـ لأ إنت ما تعرفش أنا كنت حاسة بإيه لما الدكتور قال إن الطفلة مش بنتك كنت بتبصلي كأنك مستني اللحظة دي من زمان كنت عايز تثبت إني خاينة أكتر ما كنت عايز تعرف الحقيقة

ما ردش

كملت وأنا ببصله في عينيه

ـ لو بنتنا ما رجعتش مش هقدر أنسى اللي حصل ولو رجعت مش معنى كده إن كل حاجة هترجع زي الأول