عوده مفاجئة…. مشيره محمد
. رحلتي اتلغت ورجعت البيت بدري عن المعاد اللي كنت مرتبة له. فتحت الباب، لقيت واحدة واقفة ولابسة برنس الحمام بتاعي، وبتبتسم لي وبتقول بكل برود: “أنتي السمسارة صح؟”
ما كدبتش خبر، ووافقت ودخلت في الدور.. عشان كنت عايزة الحقيقة تظهر كاملة قدام عيني.
الحكاية بدأت وأنا خلاص في المطار ومسافرة في رحلة شغل، وفجأة سمعت النداء في المايك: “تم إلغاء الرحلة”. قالوا بسبب سوء الأحوال الجوية وأعطال فنية، وما فيش ميعاد تاني محدد.
كنت متضايقة ومخنوقة.. بس في نفس الوقت حسيت براحة غريبة مش عارفا لها سبب.
بدل ما أروح أحجز تذكرة تانية، أخدت تاكسي ورجعت على البيت. قلت أعملها مفاجأة لزوجي “شريف”.. بقالنا فترة علاقتنا باردة وبقينا عايشين زي الأغراب في بيت واحد، فقلت أديك يا ستي فرصة نقضي ليلة هادية مع بعض ونصلح اللي اتكسر.
وصلت وطلعت المفتاح وفتحت باب الشقة..
وهنا كانت الصدمة.. واحدة واقفة في الصالة!
ولابسة البرنس بتاعي!
شعرها مبلول وكأنها لسه خارجة من الحمام حالا، وماسكة مج من مجات القهوة بتاعتي في إيدها، وواقفة بمنتهى الراحة والهدوء.. ولا كأنها صاحبة المكان. أول ما شافتني، ابتسمت بأدب مبالغ فيه وقالت باعتذار:
”أه.. أنتي أكيد السمسارة.. جوزي قال لي إنك هتيجي تبصي على الشقة.”
في اللحظة دي، حسيت بقلبي سقط في رجلي.
بس ملامح وشي ما اتهزتش، ولا بينت أي حاجة.
رديت عليها بكل ثبات انفعالي: “آه، بالظبط.. أنا هي.”
وسعت لي السكة بكل ترحاب وقالت: “تمام جداً، هو في الحمام دلوقتي.. اتفضلي خدي راحتك واتفرجي على الشقة.”
دخلت خطوة بخطوة، وضربات قلبي كانت مسموعة من كتر سرعتها.
الشقة ما كانش شكلها شقة معروضة للبيع خالص.. دي شقة معيشة كاملة! شوز مش بتاعي محطوط جنب الكنبة.. فرشة سنان تانية عند الحوض.. ورد فريش على السفرة.. ورد شريف عمره ما فكر يجيبه لي طول جوازنا!
قلت لها بنبرة عملية بحتة وأنا بداري ناري: “المكان هنا ما شاء الله جميل جداً.”
ردت عليا بلطف: “شكراً ليكي.. إحنا نقلنا هنا مع بعض من كام شهر فاتوا.”
”إحنا”!!
هزيت دماغي وأنا بتظاهر إني بتعاين المكان، وعقلي عمال يودي ويجيب.. لو واجهتها دلوقتي هتتخض وتعمل حوار.. ولو واجهت شريف هيقعد يحور ويكدب.. أنا لازم أجمع كل الخيوط في إيدي الأول.
