صحيت الصبح بدري على صوت تليفوني وهو بيرن للمرة العاشرة

كان كريم

بصيت للاسم اللي على الشاشة وابتسمت بسخرية قبل ما أرد

ألو يا حبيبي

أول ما سمع صوتي ضحك وقال

صباح الخير يا أجمل حاجة في حياتي

زمان كنت بسمع الجملة دي وأحس إن الدنيا كلها ملكي لكن المرة دي حسيت إني بسمع صوت ممثل بيردد كلام حافظه من زمان

رديت بهدوء

صباح النور يا كريم

إيه صوتك ده مالك تعبانة

لا أبدا بس ما نمتش كويس

طب قومي البسي وتعاليلي بسرعة أنا مستنيكي

حاضر يا حبيبي

قفلت المكالمة وقعدت على طرف السرير

كان عندي اختيارين يا إما أروح وأواجهه بالحقيقة وأشوفه بيكدب إزاي يا إما أسيبه يكمل لعبته وأعرف هو مخطط لإيه

واخترت التاني

لبست هدوم بسيطة وحطيت موبايلي في الشنطة وخدت معايا تليفون قديم كان مركون في درج المكتب

ما كنتش ناوية أعمل أي حاجة متهورة ولا أواجه حد من غير دليل

أنا كنت محتاجة أفهم المقلب الأخير وإيه اللي سارة عايزة توصله بالظبط

قبل ما أخرج اتصلت بصاحبتي من أيام الجامعة داليا

داليا كانت الوحيدة اللي فضلت واقفة جنبي وقت اتهامي بسرقة مشروع التخرج حتى لما أغلب زمايلنا صدقوا الكلام اللي اتقال عني

ردت عليا وهي بتضحك

يا بنتي إنتي لسه عايشة ولا كريم العزايزي خطفك مننا خلاص

قلت لها

داليا أنا محتاجة أشوفك النهارده وعايزة أطلب منك طلب مهم

نبرة صوتي خلتها تسكت

فيه إيه يا ندى

مش هقدر أحكيلك في التليفون بس محتاجة مساعدتك في موضوع قديم يخص الجامعة

قالت من غير تردد

أنا جاية لك في أي مكان تحدديه

شكرتها وقفلت وبعدها نزلت من البيت

كنت عارفة إن اليوم ده مش هيعدي عادي

لكن ما كنتش أعرف إن أول مفاجأة هتقابلني هتكون قبل ما أوصل لكريم أصلا

لما وصلت المستشفى اللي قاللي إنه موجود فيها لقيته مستنيني في أوضة خاصة في الدور التالت

أول ما شافني فتح دراعاته وقال

تعالي هنا يا قلب كريم

قربت منه وخلّيته يحضني للحظات

كان بيطبطب على ضهري ويقول

أنا عارف إنك اتخضيتي عليا امبارح بس الحمد لله ربنا نجاني عشان لسه لينا عمر مع بعض

كنت عايزة أقوله إن ربنا نجاني أنا من الوهم اللي كنت عايشة فيه لكن اكتفيت بابتسامة صغيرة

بصلي في وشي وسألني

إنتي مالك يا ندى حاسك متغيرة

قلت له

يمكن عشان خوفت عليك أوي

مسك إيدي وبص على مكان الإبرة

يا حبيبتي إنتي اتبرعتي بدمك عشاني أنا مش عارف أردلك الجميل ده إزاي