مقلب99
#مشيره_محمد
إيه الجمال ده يا ندى هو أنا هقدر أسيبك بعد كده
بصيت له وقلت
على حسب إنت ناوي تعمل إيه
ضحك وهو فاكر إني بهزر
وبعدين مسك إيدي ودخلنا القاعة
كان فيه ناس كتير من أصحابه وأفراد من عيلته وكام شخص من الجامعة القديمة
وفجأة لمحت سارة واقفة جنب المسرح بفستان أسود أنيق
كانت بتبصلي بابتسامة باردة
قربت مني وقالت
وحشتيني يا ندى
رديت بهدوء
إنتي كمان يا سارة
بصت للدبلة في إيدي وقالت
لسه محتفظة بيها
قلت
أيوه ولسه فاكرة اليوم اللي لبستها فيه
ابتسمت وقالت
بعض الحاجات لازم الواحد يفتكرها كويس قبل ما يقرر يكمل حياته
ما رديتش
بعد دقائق كريم طلع على المسرح وخد الميكروفون
مساء الخير يا جماعة أنا مبسوط إنكم كلكم موجودين النهارده عشان تحتفلوا معايا برجوعي بالسلامة
الناس صقفت
كمل وهو بيبصلي
وفيه شخص في حياتي أثبتلي إنه مستعد يضحي بأي حاجة عشاني وده خلاني أفكر إن الوقت جه إني أشارككم خبر مهم
قلبي ما اتحركش زي زمان
كنت عارفة إنه بيحضر لشيء
كريم نزل من المسرح وجالي ومد إيده
ندى تعالي جنبي
طلعت معاه وأنا بحاول أبان طبيعية
وقفنا قدام الناس وهو مسك الميكروفون وقال
أنا وندى بقالنا تلات سنين مع بعض والنهارده قررت إني أديها فرصة تثبت قدام الكل إنها فعلا بتحبني زي ما بتقول
الناس بدأت تبص لبعض باستغراب
أنا بصيت له وسألته
تقصد إيه يا كريم
ابتسم ابتسامة مصطنعة وقال
ولا حاجة يا حبيبتي مجرد لعبة صغيرة بينا
في اللحظة دي سارة قربت من المسرح وشاورت لواحد من العاملين
بعد ثواني ظهرت على الشاشة الكبيرة صورة لورقة مكتوب فيها إقرار بخط إيدي
أو على الأقل ده اللي كانوا عايزين الناس تصدقه
كان مكتوب في الورقة إني أعترف إني خنت ثقة كريم وإني كنت بتقرب منه عشان أستفيد من فلوس عيلته وإني وافقت على كل المقالب السابقة بإرادتي
القاعة بدأت تهمس
كريم بصلي بحزن مصطنع وقال
أنا ماكنتش عايز أوصل الموضوع لكده يا ندى لكن إنتي أجبرتيني
سارة رفعت صوتها وقالت
إحنا كلنا عارفين إن ندى كانت بتلعب بمشاعر كريم من البداية وإنها حاولت تخليه يبعد عن الناس اللي بيحبهم
حسيت بالغضب بيطلع جوايا لكني ما صرختش
بصيت للشاشة وبعدها بصيت لكريم وقلت
إنت متأكد إن الورقة دي بخط إيدي
رد بثقة
أيوه يا ندى
قلت
طب ممكن تقرأ آخر سطر بصوت عالي
اتوتر لحظة لكنه قرب من الشاشة وبدأ يقرأ
