مقلب99
#مشيره_محمد
بالعكس ده ضروري جدا طالما بتعرضوا كلام منسوب لي قدام الناس
واحد من الحضور قال
سيبوها تسمع التسجيل يا جماعة
كريم حاول يغير الموضوع لكن الناس بدأت تطلب تشغيله بالكامل
بعد لحظات اتشغل التسجيل من البداية
كان صوتي واضح وأنا بتكلم مع كريم في مكالمة قديمة
كنت بقوله إني مستعدة أعمل أي حاجة عشان أساعده لو كان محتاج مساعدة حقيقية
وبعدها مباشرة كان صوت كريم بيقول
طب لو طلبت منك تثبتي إنك بتحبيني هتعملي إيه
وردّيت عليه
لو في حاجة أقدر أعملها من غير ما أضر حد هعملها
التسجيل اتوقف فجأة قبل ما يسمعوا بقية المكالمة
بصيت لكريم وقلت
ليه التسجيل اتقطع قبل آخر جملة
ما ردش
طلبت من العامل يشغل الملف الكامل لو موجود
لكن سارة صرخت
كفاية بقى إحنا مش في محكمة
في اللحظة دي فهمت إنهم مش خايفين من كلامي قد ما هم خايفين إن حد يسمع القصة كاملة
مازن حاول يتدخل وقال
يا جماعة الموضوع كله سوء تفاهم وإحنا كنا بنهزر مع ندى
بصيت له وقلت
بتهزروا لما تتهموني بسرقة مشروع التخرج وبتسموا ده هزار لما تخلوني أصدق إن خطيبي بيموت وأنا أتبرع بدمى عشانه
القاعة كلها سكتت
كريم بصلي بحدة وقال
إنتي عرفتي الكلام ده منين
السؤال خرج منه قبل ما يفكر
ابتسمت وقلت
هو ده المهم دلوقتي ولا المهم إنك كنت بتكدب عليا من البداية
مازن بص لكريم بقلق وسارة بدأت تتكلم بسرعة وتحاول تبرر
لكن كريم فقد أعصابه فجأة وقال
أيوه كنا بنهزر معاكي وإنتي اللي كنتي بتصدقي كل حاجة
الجملة وقعت على القاعة زي الصاعقة
حتى هو نفسه سكت بعد ما قالها
أنا فضلت باصة له ثواني
وبعدين قلت
شكرا يا كريم
بصلي باستغراب
على إيه
على إنك أخيرا قلت الحقيقة بنفسك
ناس كتير سمعت الجملة وشافت رد فعله
لكن أنا ما اعتبرتش ده نهاية الموضوع ولا دليل كافي على كل اتهام
كان لسه فيه حاجات لازم تتراجع بشكل رسمي
وفي اللحظة دي دخلت واحدة من قريبات كريم وكانت واقفة من أول الحفلة في آخر القاعة
قالت بصوت متردد
أنا مش عارفة إذا كان ليا حق أتكلم ولا لأ بس فيه حاجة لازم تعرفوها
كريم لف ناحيتها وقال بعصبية
إنتي كمان هتدخلي نفسك في الموضوع ليه
ردت
عشان أنا كنت موجودة يوم ما اتكلمتوا عن ندى في بيت العيلة وسمعتكم بتخططوا للمقلب ده
مازن وشه اصفر
أما سارة فحاولت تضحك وقالت
إنتي فاهمة غلط
قريبته ردت
أنا مش فاهمة غلط أنا سمعت بعيني وداني إنكم كنتوا ناويين تعرضوا ورقة مزورة وتخلوا ندى تعتذر قدام الناس عن حاجة ما عملتهاش
