الجزء الثالث

19

” مُتنفسي في العشق أنتِ ، رائحة طفولتي وماضيي وحاضري .. ملاذي الأمن وسٌكري ، سيدة سماء أمنياتي وجليسة قلبي ، أحبك للحد الذي يجعلني أستيقظ كل يوم فقط لإنني سأراكِ ! ”

#بقلمي

بدأت رحلة علاج راميس ، والدها وشرف كانوا الداعم الأهم ليها ، بيمنحوها قوة سحرية بحبهم ليها عشان تقاوم وتكمل ، رغم إن الجلسة الأولى كانت صعبة وثقيلة عليها لكنها تحملت ، شرف كان في عينيه أمل بيمنحه ليها كل ما يبصلها وهي كذلك كانت محتاجة ل دا جداً ، مرت الأيام سريعاً وفي أخر الإسبوع وصل على إيميل شرف مسج من ليث .. محتواه دعوة فرحه على نرجس

إبتسم شرف بسعادة وهو بيقرأ الرسالة بعدين رد قال ( من كُل قلبي مبروك ليك ، مبسوط إنك أخيراً حققت حلمك ، أنا هنا بحقق حلم زيك من نوع تاني بعيد عن مجال عملي ، هتعرفه وهحكيلك عنه بعدين وهتعرف مدى أهميته بالنسبة ليا ، بس أوعدك هنزل في سبوع أول مولود ليك ، وسلملي على سيادة اللواء قوله إبنك شرف لأول مرة يعمل حاجة واثق إنك لما تعرفها هترضيك ♡ )

* في شقة سيادة اللواء

إبتسم ليث وهو بيقرأ الرسالة ، رفع راسه لأبوه وهو بيبصله نفسه يسامح شرف زي ما سامحه ، بس مكانش اليوم المناسب إنه يكلمه في الموضوع دة ، دا يوم فرحه على نرجس !

سيادة اللواء وهو بيبص على ساعة الإيد اللي هيلبسها في فرح إبنه : خليه يشيلك دقنك خالص ، متروحش الفرح بالجنينة اللي حوالين بوقك دي

ليث وهو بيحسس على دقنه : بس نرجس بتحبها !

سيادة اللواء : لما تتشوك منها هتحلقهالك بنفسها ، إنت حر .. بس الفرح دا هيبقى فيه مراكز عالية ووزراء مش حلو لظابط شرطة خف من جلسات العلاج الطبيعي وقرب يرجع شغله يروح فرحه بدقن

ليث وهو مثبت إيديه في الهواء قدام أبوه : أنا لسه مخفيتش بس تمام أقنعتني يا والدي ، هخليه يشيلها على خفيف برضو

ابوه بيوطي يجيب الجزمة ف ليث جري على الاوضة

سيادة اللواء : روح الله يخيبك ، دا أنا بجيب الجزمة عشان ألمعها

* في شقة نرجس

أمها : وحطيتلك منه لونين واحد إسود والتاني لونه وردي الفاتح دا

نرجس بتعديل : أه تقصدي سوفت بينك ..

والدتها : أه ياختي هو اللي عوجتي بوقك عشان تقوليه دة

ضحكت نرجس والبنت بتحطلها الميك أب

البنت : أنا حطيتلك الأساس بس تحبي اللوك النهائي يكون هادي ولا صارخ ؟

والدة نرجس : إعمليلها حاجة هادية كدة عشان هتتجوز ظابط وهيحضر الفرح ناس مهمة أكيد م هيحبوا يشوفوا أراجوز قدامهم