حماتى بتفتش اوضتى

#مشيره_محمد

السر اللي حماتي كانت بتحاول تخبيه

بعد ما الحاجة نادية خرجت من البيت وقفت أنا وأحمد في أوضة النوم مش قادرين نستوعب اللي حصل

أحمد كان باصص للباب ووشه متغير أما أنا فكنت حاسة إن فيه حاجة أكبر بكتير من مجرد تدخل حماتي في خصوصياتي

أحمد لف ناحيتي وقال

مريم أنا عايزك تفهميني حاجة هو إنتي كنتي عارفة إنها هتدخل الأوضة وتعمل كده؟

بصيت له وقلت

أنا كنت عارفة إنها هتدخل لأن ده اللي بتعمله في كل زيارة لكن المرة دي قررت إني مش هسكت

قعد على طرف السرير وحط إيده على راسه وقال

أنا مش فاهم ماما مالها اليومين دول

ضحكت بمرارة وقلت

اليومين دول يا أحمد؟ ده بقالها شهور بتعمل كده وأنا كل ما أتكلم معاك تقولي إني مكبرة الموضوع

رفع عينه ليا وقال

أنا اعترف إني ماخدتش كلامك بجدية لكن اللي حصل النهارده غريب فعلا

كنت مستنية أسمع منه الاعتراف ده من زمان لكني بدل ما أحس بالراحة لقيت نفسي خايفة من اللي جاي

قلت له

أحمد أنا مش عايزة أعيش في بيت كل ما حماتي تزورني أبقى خايفة على حاجاتي الشخصية

رد بسرعة

خلاص مش هسيبها تدخل أوضتنا تاني من غير ما نكون موجودين

هزيت راسي وقلت

الموضوع مش مجرد إنها تدخل الأوضة الموضوع إنها بتدور على حاجة محددة وأنا عايزة أعرف إيه هي

أحمد سكت شوية وبعدين قال

يمكن كانت بتدور على حاجة تخصني

بصيت له باستغراب

حاجة تخصك إزاي؟

قال وهو بيحاول يبرر

مش عارف يمكن ورقة قديمة أو حاجة من حاجاتي اللي كانت موجودة هنا قبل ما نتجوز

قلت له

طيب لو بتدور على حاجة تخصك ليه تفتش في درج ملابسي أنا؟

ماعرفش يرد

وفي اللحظة دي رن تليفونه

كانت أمه

بص للشاشة وبعدين بصلي وقال

أرد عليها؟

قلت له

طبعا دي أمك

رد على المكالمة وحطها على السماعة الخارجية

أول ما صوتها ظهر قالت وهي بتعيط

أحمد إنت إزاي تسمح لمراتك تهينني بالشكل ده؟ أنا أمك يا ابني أنا اللي ربيتك وشقيت عليك وفي الآخر تقف تتفرج وهي بتتهمني إني حرامية؟

أحمد اتوتر وقال

ماما محدش قال إنك حرامية إحنا بس عايزين نفهم إيه اللي حصل