طبيب جـ.ـراح

#مشيره_محمد

أول ما الدكتور مروان الشافعي استلم ورق الطلاق وسط زملائه في مستشفى القصر العيني حس إن الأرض بتتهز من تحته

فضل باصص للورق وهو مش مصدق إن كلارا اللي عاش معاها سبع سنين كاملة ممكن تاخد قرار زي ده من غير ما حتى تتصل بيه أو تستناه يرجع البيت

واحد من زمايله الدكتور حسام قرب منه وسأله باستغراب

مالك يا مروان وشك اتغير ليه كده

مروان لم الورق بسرعة وحطه في الملف اللي كان ماسكه وقال بتوتر

مفيش حاجة دي مشكلة عائلية بسيطة وهتتحل

حسام بصله باستغراب وقال

مشكلة عائلية بسيطة وإعلان طلاق يوصلك في نص حفل تكريمك أمال لو كانت مشكلة كبيرة كنت عملت إيه

مروان اتعصب وقال

يا عم بقولك هتتحل متكبرش الموضوع

لكنه رغم محاولته إنه يبان هادي كان من جواه بيغلي

طلع تليفونه واتصل برقم كلارا القديم لكن الرقم كان مقفول

اتصل مرة واتنين وتلاتة وفي كل مرة يسمع نفس الرسالة

الرقم الذي طلبته غير متاح حاليا

فتح محادثتهم على الواتساب وبعتلها رسالة

كلارا إيه اللي إنتي عملتيه ده اتصلي بيا حالا

استنى شوية وبعت رسالة تانية

أنا عارف إنك زعلانة عشان مجتش أزورك بس الموضوع مش مستاهل كل ده

وبعدها كتب

إنتي ناسية العشرة اللي بينا ولا إيه

فضل يبص على الشاشة مستني ظهور علامتي الاستلام لكن مفيش أي حاجة اتغيرت

في اللحظة دي دخلت عليه زميلته الدكتورة نادين اللي كانت مشاركة معاه في مشروع زراعة الأعضاء وقالتله

مروان إنت كويس

رد عليها بعصبية

هو أنا شكلي مش كويس

نادين رجعت خطوة لورا وقالت

أنا بس بسألك عشان إنت من ساعة ما استلمت الظرف وإنت متوتر

مروان بص لها وقال

مراتي رفعت قضية طلاق وهي لسه خارجة من المستشفى وأنا مش فاهم دماغها فيها إيه

نادين سكتت لحظة وبعدين قالت

يمكن عشان قضت شهر كامل في المستشفى وإنت ولا مرة دخلت عليها

مروان بص لها بحدة

إنتي كمان هتدخلي في الموضوع

نادين ردت بهدوء

أنا مش بدخل في حاجة يا مروان بس أنا فاكرة كويس إنك كنت بتخرج من المستشفى وتحضر اجتماعات وعشاوات ومناسبات في الوقت اللي كلارا كانت حالتها حرجة فيه