اتهــــــــام
#مشيره_محمد
#مشيره_محمد
صرخة الممرضة اللي جت من بره الأوضة خلتني أنتفض وأنا حاضنة البنت الغريبة اللي بين إيديا
كنت حاسة إن الدنيا بتلف بيا وإن جسمي اللي لسه ما تعافاش من الولادة مش قادر يستحمل صدمة أكبر من كده
بصيت للدكتور وقلتله بصوت مبحوح
ـ دكتور أرجوك قولي إن فيه غلط في التحليل قولي إن فيه أي احتمال إن النتيجة دي تكون غلط أنا مش ممكن أكون مش أم البنت اللي أنا ولدتها بعيني
الدكتور قرب مني وقال بحذر
ـ يا مدام منى أنا مقدر حالتك وإنك لسه خارجة من الولادة لكن لازم نحافظ على هدوئنا لحد ما نفهم اللي حصل
أحمد كان واقف في مكانه مش بيتحرك وعينيه معلقة بالسوار اللي في رجل الطفلة
وفجأة صرخ
ـ يعني إيه بنت رانيا منصور دي مين رانيا منصور أصلا وإزاي بنت واحدة غريبة تبقى في حضن مراتي
بصله الدكتور بحدة وقال
ـ أنا مش هقدر أجاوب على الأسئلة دي قبل ما نعرف إيه اللي حصل بالضبط لكن فيه حاجة لازم تفهمها يا أستاذ أحمد نتيجة التحليل مش بتقول إن مراتك خانتك وبس زي ما أنت كنت فاكر النتيجة بتقول إن الطفلة مش بنتك ومش بنت مراتك كمان وده معناه إن فيه احتمال كبير إن حصل تبديل أطفال
أحمد رجع لورا وهو بيهز راسه
ـ تبديل أطفال إيه يا دكتور إحنا في مستشفى محترمة مش في فيلم
قلتله وأنا بعيط
ـ طب وبنتي راحت فين يا أحمد بنتي اللي أنا شيلتها بعد الولادة وفضلت أبص في وشها بالساعات راحت فين
لف ناحيتي وبصلي بنظرة غريبة وقال
ـ أنا مش فاهم حاجة
صرخت فيه لأول مرة من ساعة ما دخلنا المستشفى
ـ وأنت كنت فاهم لما اتهمتني بالخيانة من غير ما تسمعني كنت فاهم لما كسرت قلبي وأنا لسه بولد بنتي كنت فاهم لما خليتني أوافق على تحليل عشان تثبت إني خاينة
سكت أحمد وما ردش
وفي اللحظة دي دخلت ممرضة وهي بتعيط ووراها ممرضة تانية بتحاول تهديها
الدكتور سألها بسرعة
ـ إيه اللي حصل بره يا سارة
الممرضة كانت بتترعش وقالت
ـ فيه ست في أوضة الأطفال بتصرخ وبتقول إن بنتها اتبدلت وإن الطفلة اللي عندها مش بنتها وإن السوار اللي في رجل البنت مكتوب عليه اسم واحدة تانية
الدكتور بص للسوار اللي في رجل الطفلة اللي معايا وبعدين بص للممرضة
ـ اسم الست إيه
قالت وهي بتبلع ريقها
ـ رانيا منصور
حسيت إن الدم اتجمد في عروقي
رانيا منصور
الاسم اللي مكتوب على سوار الطفلة
