الجزء الثالث

الفصل الثالث عشر بين ظلال الحب بقلم شروق مصطفى أخذ يلعن قراره مئة مرة، كيف سمح لنفسه أن يكون بجوارها في المكان نفسه بلا فاصل؟ كانت عيناه لا تفارقانها، تلتقطان تفاصيل حركاتها، انفعالاتها، غضبها الصامت، وحتى لحظات انغماسها في الرسم. تسلل إليه شعور دافئ وهو يراها أمامه، حبه الأول ينبض بالحياة، كأنه يراها للمرة الأولى. كل شيء يدفعه للبوح، لكنه تراجع، متذكرًا تحذير ابنة عمها بأن الحديث عن الماضي قد يعيد لها حالة الهوس التي تخافها. قرر أن يبدأ طريقه نحو قلبها كصديق أولاً، حتى يكون مستعدًا لاحقًا لمصارحتها. لم يطل تفكيره كثيرًا، نهض وتوجه إليها بخطوات ثابتة، ووقف أمام لوحة الرسم، يرسم ابتسامة هادئة على وجهه وهو يهمّ بحديثها: _ ميعاد الغدا هتيجى معايا ولا شبعانة زي امبارح؟ تركت القلم ونهضت بسرعة، فقد سئمت من جلوسها الطويل: _ انا جايه معاك. خرج وهي تتبعه باتجاه المطعم، حيث طلب كل منهما طعامه الخاص. جلس على طاولة وبدأ في تناول طعامه، بينما وقفت هي حاملة طبقها، تتلفت حولها بحثًا عن مكان فارغ. عندها ناداها بدر مشيرًا إلى مقعد بجواره: مش هتلاقي مكان، تعالي هنا، الوقت قرب يخلص. جلست معه على نفس الطاولة، وتناولت طعامها في صمت حتى قطعه هو بسؤاله: عملتي إيه في التصميمات اللي محتاجها النهارده؟ ما تمشيش إلا لما تخلصيها، عشان هتدخل المصنع النهارده ويبدأوا فيها. كلمي البيت وبلغيهم إنك هتتأخري. نظرت إليه بامتعاض، وقالت بغضب مكتوم: _ حاضر. أنهى طعامه، قائلاً: متتأخريش، البريك فاضل له خمس دقايق بس. تركها وذهب، فنظرت خلفه متمتمة بسخرية، مقلدة صوته: "متتأخريش، البريك خمس دقايق!" غلس... كأنّي مش عارفة! يا ربي على الورطة اللي أنا فيها. أنهت غداءها هي الأخرى، ثم نهضت متجهة إلى مكتبها لتكمل باقي التصميمات. ... في مكان آخر، سلّم شخصٌ ما بعض الأوراق لشخصٍ مجهول، قائلاً: كل حاجة موجودة هنا بالتفصيل الممل. ألقى الآخر نظرة سريعة على الأوراق، ثم أخرج من جيبه بعض المال وقال: هايل، هايل... وده نصيبك، مش خسارة فيك. الباقي عليّ أنا. سلام، وانت بقى. ... اتصلت من المكتب تُبلغ من في المنزل بأنها سوف تتأخر اليوم، واتفقت مع عهد أن تأتي لأخذها في طريقها بعد إغلاق العيادة. عادت إلى عملها لتكمله، وبينما كانت ترسم، رفعت عينيها ونظرت نحوه. كان منهمكًا في بعض الأوراق أمامه، فشردت للحظة في ملامحه، مسترجعة ذكريات لحظاتهم السابقة؛ كلماته، قربه منها، ضحكته، ولقاءاتهما معًا. فجأة، انتبه إلى نظراتها، فارتبكت بسرعة وعادت إلى التركيز على لوحتها، متوترة وملومة نفسها على تطلعها نحوه. أحست بالحرج، واشتعل وجهها خجلًا، بينما قلبها يخفق بشدة لا تعرف سببها. حاولت بتركيزها على عملها أن تُنهيه سريعًا لتسلمه وتغادر قبل أن تزداد ارتباكًا. أما هو، فقد كان يراقبها بين الحين والآخر، يشتاق لوجودها جانبه كالسابق، ويشعر برغبة في تعويضها عما عانته من ألم وظلم في الماضي. حين تلاقى نظرهما، لاحظ خجلها، فابتسم داخليًا، ثم عاد للتركيز على عمله. بعد قليل، انتهت من عملها ونهضت لتقديم التصاميم له. أخذها منها، متأملًا التفاصيل، ثم قال بإعجاب: جميل جدًا،... -استنيني هوصلك هبعتهم بس المصنع وأجي تمام. التفتت اليه تتحدث له: - مفيش داعي عهد قالت انها توصلني هنزل استناها تحت لأنها معاها العربية شكرا ليك. غادرت من أمامه، فنهض خلفها مباشرة ليسلّم التصاميم إلى العامل، ليقوم بإرسالها إلى المصنع فورًا. كان ينتظر هذه اللحظة ليتحدث معها ويجلس أطول وقت ممكن بجانبها، سعيًا للتقرب إليها. خرج من الشركة ووجدها جالسة في حديقة الشركة، على السور الرخامي، تدفع بقدميها للأمام، وتنتظر ابنة عمتها لتقلّها إلى المنزل. اقترب منها وجلس بجانبها حين لاحظ شرودها، وبدأ يتجاذب معها أطراف الحديث. انتبهت لوجوده حين جلس إلى جانبها، فهتف لها مبتسمًا: _ حلو الجو صح. كانت تنظر للسماء، وبريق عيناها يلمع هتفت له وهي تتحدث معه بأريحية: - أوي تعالى عد معايا النجوم بقا. تطلع اليها بتعجب، ثم أبتسم داخليا، وحاول أن يجاريها في الكلام: _ يلا كل واحد يعد من ناحيته. هتفت بأعتراض طفولي: - لا أنا عديت ناحيتي قعدني مكانك بقا عشان أكمل. هتف وهو يقهقه معترضا: _ لأ، عجبني مكاني مليش فيه عيديهم من الأول تاني. نفخت أودجتها: _ خلاص ماشي عد بقا وانت ساكت ماشي عشان ما تلغبطنيش. قهقه ضاحكًا بصوت عالٍ وهو يرفع نظره إلى السماء، ثم قطع الصمت وهو يوجه نظره إلى وجهها الذي كان موجهًا للأعلى: إيه اللي حصل لك زمان؟ إزاي وصلت للحالة دي؟ تلاقى نظرهما في لحظة طويلة، شعرت بحشرجة في حلقها، ثم نطقت بتردد: يعني... أنت عرفت بحالتي؟ حرك رأسه موافقًا في صمت، ثم نظر إليها وسأل بنبرة هادئة: هو... بيعمل لك مشاكل دايمًا كده؟ نظرت للأمام، وهزت قدميها بعشوائية، ثم أطلقت زفيرًا طويلًا وكأن الكلمات كانت تثقل قلبها: آه، اتعودت على كده. دايمًا بوقع في مشاكل، وبحاول أصلح اللي ينفع. مرض ثنائي القطب بيخليني أعمل حاجات كنت استحالة أعملها في الظروف الطبيعية. نظر إليها بصمت لفترة، ثم قالت هي بنبرة حازمة: مهما كان، لازم أواجه ده. طالما أنا قوية، هقدر أتخطى أي عقبة وأقدر أنسى... عندما شعر أنه على وشك التطرق للماضي، تدخل بسرعة: تنسي إيه؟ كملي. صمتت لوهلة، ثم قالت بصوت خافت: أنسى كل حاجة... وهكون بخير بعدها. نظر إليها بتشجيع: هتقدري تتغلبى عليه، وأنا هكون جنبك. ثم غيرت هي مجرى الحديث فجأة، وأشارت إلى شيء في السماء، وقالت بابتسامة جذابة: بص، ده ضوء طيارة صح؟ تطلع إلى السماء معها، واندمجا للحظة في جمال المنظر، حتى انشغلا بوصول ابنة عمتها. أخذتها وغادرت معها، بينما اتجه هو إلى منزله. ... عند وصولها للمنزل، دخلت غرفتها، وبدلت ثيابها، ثم استلقت على السرير. شعرت بالطمأنينة بعدما رأت الأمان في عينيه، وليس الخبث كما كانت تظن. ابتسمت براحة وغفوت. أما هو، فدخل غرفة ابنته، وقبل جبينها، ثم دثرها بالغطاء، واتجه إلى غرفته وهو يهمس "بكرة هعوضك عن كل حاجة يا دهبتي" غير ملابسه إلى ملابس أكثر راحة، ثم جلس ليكتب بعض الأشياء التي ينوي تنفيذها، قبل أن يغفو. في صباح يوم جديد، دخلت إلى الشركة، ولكن فور دخولها، لاحظت أن وجهه لا يوحي بالخير. ألقت السلام، وكادت أن تلتقط مكانها المعتاد، لكن سرعان ما وصل إلى مسامعها صوته الأجش وهو يوقفها. كان قد وصل قبلها إلى الشركة وبدأ في ترتيب بعض الأعمال على مكتبه. لكن تأخرها أثار غضبه، وراح يدير القلم بين يديه في صمت، يفكر في طريقة لمعالجة الموقف حتى حضرت أمامه. وعندما سمع صوتها، أوقفها بصوت جاف وقوي: كل يوم هتيجي متأخرة كده؟ المواعيد دي مش هتنفع، لازم يكون في التزام. الشركة ليها نظام، والتأخير مرفوض. شعرت بتوتر شديد وكادت أن تتفجر بالبكاء، لكن احتفظت بهدوئها وقالت بسرعة: عارفة النظام تمامًا والله، لكن أنا بحب شغلي كمدرسة. حضرتك لو مش عاجبك ممكن تستغنى عني، لكن ماقدرش أستغنى عن الأطفال. يومي من غيرهم مش بيكمل. آسفة لو سببت لك أي مشكلة هنا، وهحاول بقدر الإمكان ماأتأخرش تاني. صمتت بعدها، تنتظر ردة، وعندما لاحظت أنه أطال الصمت، شعرت أنها بحاجة للمغادرة وبدأت تتحرك من أمامه لكنها توقفت تسأل عن شئ...! كان ينوي فقط توبيخها ليحثها على الالتزام، لكنه حين سمِع كلماتها عن الاستغناء عنها، توقف لسانه. همس داخليا: "أنا ما صدقت لاقيتك." فقط عندما سمع صوتها مرة أخرى تحدثه، استفاق من شروده. _ هي دهب مجتش ليه انهاردة؟ أفاق من شروده على سؤالها لأبنته: _ تعبت الصبح حسيتها دافية مرضتش اوديها واخدت اجازة. فتحت عيناها على اوسعهم تسأله بلهفه: _ يا حبيبتي الف سلامه عليها طيب هي بقت كويسة يعني؟ _ بقت أفضل الحمدلله بس مغلباهم شويه هناك. _ ربنا يبارك فيها، انا بحبها اوي زعلت لما قولتلي تعبانه الف سلامه عليها أصلي اتعود اشوفها في الكلاس. ابتسم لها، وأخذته فكرة ما: طيب، إيه رأيك لو تشوفيها؟ هايفرق معاها قوي لو روحتي لها. هتفرح قوي بجد. إيه رأيك نخلص الشغل ونروح لها سوا؟ تفاجأت من سؤاله، ولم تفهمه في البداية. تلعثمت في الرد، تهز رأسها بدهشة وتردد: أشوفها! أشوفها فين وازاي؟ مش فاهمة. رد عليها بهدوء، مبتسمًا: متقلقيش، والدتي هتستقبلك. لم تجد مفرًا، فهزت رأسها بموافقة، ثم أشار لها أن تكمل عملها، بينما هو أيضًا انشغل بما لديه حتى ينتهيا، ثم يغادران معًا. ـــــــ داخل فيلا عز الدين، كانت الفتاة المدللة نائمة في فراشها، وجانبها الجدة التي بدا عليها التعب من محاولاتها المتكررة لإطعامها: كده يا دودو يا بنتي، يلا كلي حاجة عشان تاخدي الدوا لما بابا يجي هقوله ويزعل منك. ... بعد مرور بعض الوقت، نهض بدر من مجلسه: أنا خلصت، يلا بينا؟ جمعت أشيائها بسرعة، وضبطت الأوراق، ثم قدمتها له. _ وأنا خلصت ودي كل تصميمات خلصت وهكمل الباقي في البيت وهسلمهالك بكره باذن الله. أخذ منها تلك الأوراق هاتفا: _ تمام يلا بينا. غادرا سوياً، وعندما وصلوا إلى السيارة، فتح لها الباب لتصعد، لكنها توقفت لحظة، تنظر إليه بتردد. أشار لها أن تصعد وقال: مالك في إيه؟ أركبي. هتفت بتردد وخجل: أنا هركب مواصلة، وأمشي وراك، أوكي؟ ضغط على شفتيه ومسح وجهه براحة يديه، قائلاً بنبرة نافذة الصبر: أركبي يا دهب، بكلم بنتي. سبحان الله! اعتبريني السواق، ها؟ إي رأيك؟ أركبي يا ماما، يلا. لوت فمها بغيظ، وقالت وهي تصعد: ماتقوليش بنتك، أنا مش صغيرة ماشي. استدار وصعد هو أيضًا، وابتسامة جذابة ارتسمت على وجهه وهو يهمس: أنتي فعلاً مش بنتي، أنتي حبيبتي. قاد السيارة، والصمت ساد بينهما حتى وصلا إلى الفيلا الخاصة به. وعندما توقف أمام الباب، قال لها: خليكي هنا شوية، وجاي تمام. هزت رأسها بإيجاب، ثم غادر متجهًا إلى الداخل. وبعد قليل، خرج ومعه امرأة كبيرة، كانت ذاتها التي قابلتها في المدرسة. شعرت بتوترٍ، لكنها خرجت لتصافحها، ففاجأتها الأخيرة وأخذتها في أحضانها بحب. _ الغاليه تعالي في حضني يا حبيبتي أخيرا شوفتك. قال بدر عندما شاهد احمرار وجهها خجلاً وعدم ردها: "يا ماما، كفاية كده، خليها تدخل." ابتعدت عنها، لكنها لم تتركها: "دهب دي ضيفتي النهاردة، ملكش دعوة. دي حبيبتي، أول ما شوفتها دخلت قلبي. ليها حق، دهب الصغيرة تحبها، وما فيش كلام إلا عن ميس دهب، جت ومشت. النهاردة ماكلتش حاجة وحزينة ." هتفت دهب بعد أن استمعت إليها: "ممكن أشوفها؟" --- صعدوا جميعًا إلى غرفتها، وما إن رأت الطفلة دهب حتى هتفت بسعادة وهي تنهض: "ميس!" احتضنتها دهب بحنان، ثم جلست بجانبها تربت على شعرها مبتسمة: "ألف سلامة عليكِ يا قمر. ناخد الدوا؟ عشان نخف بسرعة وأشوفك في المدرسة؟" قالت الجدة، وهي تشير إلى الطعام بجانب الطفلة: "مش راضية تاكل، مغلباني. لاقيت جسمها دافي الصبح، وبتشكي من زورها. الأكل جنبها زي ما هو، ولا حركت فيه. شوفتي شقاوتها؟" نظرت دهب للطفلة بضيق، وقالت بنبرة حازمة: "كمان مخدتِش الدوا؟ لأ، هزعل منك كده يا دودو." صمتت لحظة تفكر، ثم ابتسمت وقالت: "طيب، أنا كمان مأكلتش، وجعانة أوي. إيه رأيك ناكل سوا؟" شعرت دهب أن الصغيرة دافئة بعض الشيء، فاختارت قطعة قماش ناعمة وبدأت تمسح جبينها برفق حتى خفضت حرارتها. بعدها بدأت تقدم لها بعض اللقيمات الصغيرة: "شبعت خلاص يا ميس، مش عاوزة تاني." كان يراقبهم من بعيد، مستمتعًا بتلك اللحظات التي تجمعهم بهدوء وسكينة. لكن حديث والدته فاجأه حين اقترحت أن تأتي دهب في العطلة لتساعد حفيدتها في دراستها. رأى ترددها وحيرتها، لكنها وافقت عندما تمسكت بها الطفلة الصغيرة بعناد. بعد انتهاء الزيارة، أوصلها إلى منزل عمتها، وقبل أن تفتح باب السيارة للنزول، ناداها بصوت هادئ: "دهب!" "حابب أشكرك بجد وجودك معانا فرق كتير جدا، ومبسوط انك فضلتي معايا في الشركة وياريت تفضلي دايما معايا " كانت جرأته وصراحته كفيلتين بإرباكها؛ احمرّ وجهها خجلاً، وشعرت بتوترٍ واضح في هذا الموقف المحرج. لم تجد ما تقوله، فاكتفت بإيماءة خفيفة وابتسامة باهتة، ثم سارعت بالابتعاد عنه بخطوات سريعة، بينما تلاحقها ضحكته العالية التي صدحت مستمتعًا بردة فعلها العفوية. الفصل الرابع عشر في صباح اليوم التالي، دخل المكتب ليجدها منهمكة في العمل على مكتبها، فابتسم مازحًا وقال: إيه ده؟ في ناس جاية بدري النهارده! لا تتحسدي؟ رفعت نظرها إليه وابتسمت بخفة، ثم ردت عليه: طيب، قول صباح الخير الأول! وبعدين أجي متأخر مش عاجب، أجي بدري برده مرة مش عاجب! أعمل إيه بقى؟ وبعدين، ماتفرحش أوي، النهارده بس طلعنا من المدرسة بدري بالصدفة، ومش هتتكرر تاني. تأملها بابتسامة، ورفع حاجبه بخبث، مستمتعًا بأسلوبها العفوي وردودها السريعة: أضحكي أضحكي ماشي أحلى صدفة دي ولا اية. هتفت لتغير مجرى الكلام: _ دهب عامله ايه انهارده. رفع يده باتجاه رأسه وهو يتجه إلى مكتبه ويضحك قائلاً: ياااا، الصبح مسكتني ما سابتنيش بسببك! صدعتني، تقوللي: "هي الميس هتيجي إمتى تذاكرلي؟" ولما قولتلها لسه يومين، ردت: "طيب خليها تيجي بكره!" وبعدها محاولات كتير لحد ما اقتنعت أخيراً بعد اليومين... شوفتي. ابتسمت دهب وهي ترد بحنان، ملاحظة مدى حب الصغيرة لها: دهب تعمل اللي عاوزاه أصلاً. سكتت قليلاً وهي تنظر أمامها، ثم جمعت تصميمًا كان لم يكتمل بعد، وتقدمت نحوه ببطء، ومدّت يدها بالورقة، عيناها تحملان مزيجًا من الجدية والترقب: _ أستاذ بدر شوف كده التصميم ده ناقصه حاجة تتعمل . أخذ الورقة منها، يتأمل التصميم بتركيز وهو يقول دون أن يلتفت إليها: طيب، مبدئيًا، لما تتكلمي معايا بلاش "أستاذ"، قولي بدر على طول، ماشي؟ و... قاطعت كلامه بسرعة: بس كده يا فندم؟ ما ينفعش، لازم أ... لم يمنحها فرصة لإكمال جملتها، وقال بلهجة حازمة: اسمعي الكلام يا دهب. ناديني بدر زي ما بناديكي باسمك دايمًا. ده أولًا. وثانيًا، التصميم فعلاً ناقص حاجة. جربي تشيلي الجانب ده كله وتقسميه لنصفين مختلفين، عدليه ووريني النتيجة يلا. أجابت باقتضاب، وقد ارتبكت من نظرته: تمام يا فندم. مدّت يدها لتأخذ الورقة منه، لكن حين لامست يده، شعرت بتلك الدفعة القوية من المشاعر غير المتوقعة. لم يكن ذلك فحسب، بل ضغَط بخفة على يدها وهو يعطيها الورقة، مؤكدًا: بلاش رسميات بينا يا دهب، للمرة الجاية. سحبت يدها بسرعة، وكأنها لمست نارًا، ثم هرولت إلى مكتبها. جلست بانحناءة خفيفة نحو التصميم، محاولِة إخفاء توترها الشديد. لم تستطع رفع نظرها نحوه، فنبضات قلبها تتسارع وملمس يده ما زال محفورًا في ذاكرتها. أمسكت القلم بارتباك، وكأن أصابعها قد تجمدت، وبدأت ترسم خطوطًا غير متناسقة، فقط لتحاول تهدئة نفسها. فجأة، شعرت بظله فوق رأسها، حضوره كان قويًا وواضحًا. عندما لم يتلقَّ أي رد منها، واستشف انشغالها، وقف أمامها ونادى مجددًا بنبرة مرحة: _ مالك يا بنتي! بنادي عليكي. يلا، وقت الراحة، مش هتروحي؟ ردت بصوت خافت دون أن ترفع عينيها إليه، وكأنها تحاول الحفاظ على رباطة جأشها: لا، روح أنت. أنا هخلص التصميم ده وكمان مش جعانة. طرق على مكتبها مرتين، وقال: ماشي، على راحتك. أجيبلك حاجة معايا؟ _ شكرًا... "نطقتها بصعوبة، ثم تابعت بنظرها وهو يغادر من أمامها، فتنفست الصعداء وأغمضت عينيها، واضعة يدها على صدرها وكأنها تهدّئ من دقات قلبها المتسارعة" همست لنفسها وهي تحاول استعادة رباطة جأشها: "أخيرًا مشي... يا لهوي، مش قادرة أشتغل كده! إيه اللي بيحصل لي؟ أنا اتجننت ولا إيه؟! لا، اهدي يا دهب، ركزي في شغلك. أنتِ هنا عشان العقد بس، وبعدها هتمشي. ركزي، ركزي." استمرت تهمس لنفسها، حتى هدأت قليلاً وبدأت تكمل عملها بتركيز أكبر. --- جاء الموعد الذي اتفقا عليه لإعطاء الدرس للصغيرة، وانتهى بسرعة، لكن لقاءهما لم ينتهِ عند ذلك الحد. كان مليئًا بأجواء غير متوقعة، حيث بدأ كلاهما يشعر بشيء مختلف يتسلل بينهما بهدوء، مشاعر دافئة بدأت تتسلل دون أن يدركا تمامًا متى أو كيف بدأت. --- الفصل الخامس عشر في صباح اليوم التالي، جلست دهب حول مائدة الفطور في منزل العمة، بينما كانت عيناها تراقبان الأخرى بحذر، التي كانت تلوك طعامها في صمت، قائلة بحزم: "؟ مش الدرس ده؟ أنا عارفه إنه ساعة، لكن بتهيألي يا ستي ساعتين من صلاة الظهر. خارجة وجاية لي إمتى؟ الساعة تسعة بالليل، كنتِ بتعملي إيه؟ ها؟ لولا عهد حاشتني عنك وهربتي في أوضتك كالعادة. ماشي، يوم وعدى وانتهى، بس لو اتعاد تاني..." صمتت لحظة، منتظرة ردها، لكن لم تجب. فصاحت الأخرى، متعجبة: "كنتِ فين طول اليوم؟ انطقي." توقفت دهب عن الأكل، وأصابها الاختناق، وسعلت بشدة. لم تجد ما تقول، حتى قامت ابنة عمتها بضرب ظهرها برفق ثم أعطتها كوب ماء، فهدأت قليلاً. ابتسمت بدهشة وقالت: "أحم، أه أه يا عمتو، أصل بعد الدرس البنت زهقت وخرجنا نتمشى واتغدينا بره، والله يا عمتو بس كده." وقفت العمة بجانب المائدة، تضربها بغضب شديد، وقالت بصوت حازم: "مفيش دروس في بيوت حد، يجي يدي الدرس هنا قدامنا، وده آخر كلام عندي." ثم غادرت الغرفة متوجهة إلى غرفتها، وهي تشعر بأنها اتخذت القرار الصحيح. لم يكن من المناسب أن تذهب إلى منزله وكأن شيئًا لم يحدث بينهما، خاصةً وأنه كان قد تقدم لخطبتها. أما ابنة العمة، التي كانت تراقب الموقف، نظرت إلى دهب وقالت بنبرة مستفزة: "مش قولتلك يا دهب بلاش تروحي؟ اهي قلبت علينا. ولما تقلب، انتي عارفاها. دلوقتي اعتذري له عن حضور الدرس، ولو عاوزها تيجي هنا مفيهاش حاجة." هزت دهب رأسها بتوتر، وهي ترمش بعينيها عدة مرات قبل أن تقول: "حاضر، بس قولي لعمتو ما تزعلش مني بالله عليكي." هدأتها الأخيرة، وهي تربت على يدها: _ متقلقيش هي بتطلع على مفيش وهي خايفة عليكي. ضمت دهب يديها بحماس، وعيناها تلمعان بفرح، وقالت بصوت خفيض: "أنا شكلي حبيته يا عهد، مش عارفة حصل أمتى ده، بس لما بشوفه بتلغبط أوي، مش بعرف أجمع نفسي خالص وأنا معاه." هتفت عهد بحماس، محاولة تهدئتها: "تعالي في أوضتي جوه، أحسن نتكلم هناك." جلسا معًا على الفراش، وواصلت دهب حديثها، وهي تنبض بالسعادة: "بحب بنته أوي يا دودي، أتعلقت بها قوي. ومامته ست جميلة وطيبة، فكرتني بأمي، لدرجة مكنتش حاسة إني غريبة وسطهم. بالعكس، عاملوني كويس جدًا" ابتسمت عهد وقالت بحذر: "أه يا حبيبتي، أكيد بيحبوكي وبيهتموا بيكي، خصوصًا عشان البنت الصغيرة. بس يا دهب، خلي بالك، وهقولهالك تاني: ما تفتحيش قلبك أوي، وتعشميه في حاجة شفتها جذبتك من أول مرة. حافظي على قلبك، وما تخليش لذة التجربة تخدعك. ممكن تنجرحي، وصعب القلب المجروح يداوي. خلي بالك من كلمتين دول، إلا لما تتأكدي إنه هو كمان بيحبك. لو بيحبك، مش هيفضل ساكت، اللي بيحب بيحكي للعالم كله ويشتريكي." دهب نظرت إليها بعينيها الممتلئتين بالشكوك، وقالت: "بصي، فاهمة اللي بتقولي كله والله، وعارفة إنك بتنصحيني من قلبك، ومن حكم تجاربك. بس أنا حاسة إنه كمان بيبادلني نفس الشعور، نظراته واهتمامه. طيب، ده إيه؟ كلامه طيب، وهو مبسوط، مش عارفة. لكن قلبي بيدق كلما بشوفه… صمتت لثوانٍ، تبتلع ريقها قبل أن ترد بصوت خافت: "الصراحة يعني، أنا اللي عاوزه أكمل شغل معاه، حتى لو قطع العقد اللي بينا. أنا حبيت الشغل أوي معاه، وحبيت وجوده في حياتي كمان. وبنته... مش متخيلة يوم ما أشوفهوش فيه. أصلاً، النهاردة قال لي خدي إجازة لأنني نزلت امبارح، وكده كده إجازة من المدرسة، فوافقت على عيني، أصلاً." عهد صمتت للحظة، تحاول أن تجد كلمات مناسبة، لكن لم تجد فائدة من نصيحتها، فقامت تنهض ووضعَت يدها على كتف دهب وقالت بحذر: "أنا قولت اللي يخلص ضميري. أنا رايحة عيادي لو عاوزه حاجة، كلميني. وشويّة وادخلي لماما، طيبي خاطرها، ماشي؟" دهب نزلت رأسها بتردد، لكن كلام عهد جعلها تشعر ببعض الاطمئنان، فابتسمت بحرج وردت: "أوكي، شكراً يا عهد. هتصل بيكي لو محتاجه حاجة." … . في صباح اليوم التالي، توجهت إلى الشركة كالمعتاد بعد انتهائها من اليوم الدراسي. طرقت الباب ودخلت، فوجدته يستند إلى طرف المكتب، كأنه ينتظرها. ابتسم فور دخولها، ولاحظ بعض الضيق على ملامح وجهها أثناء تحيتها، وجلوسها في مكتبها الخاص دون أن تنطق بكلمة أخرى. بدا وكأنه كان ينتظر منها شيئًا، ربما حديثًا عن أمس، لكنه خاب ظنه. أراد فتح حديث معها، فتقدم إليها بخطوات قليلة، عينيه تتابعانها وهي مشغولة بالأوراق أمامها. همهم بصوته حتى انتبهت إليه، فرفعت رأسها بعلامات استفهام: أستاذ بدر، محتاج حاجة مني؟ تطلع إليها، مراقبًا تفاصيل وجهها، وأحس أن هناك شيئًا غريبًا في تصرفاتها. سأل بقلق: دهب، فيكِ حاجة مش طبيعية النهاردة؟ في حاجة حصلت أمبارح؟ خفضت رأسها وتوترت، ثم هزت رأسها يمينًا ويسارًا، وقالت: لا، مفيش حاجة، كله تمام. ابتسمت بتوتر في آخر كلمتها، ثم انشغلت بالأوراق أمامها. هز رأسه قليلاً وكأنه لم يقتنع، ثم طرق الطاولة بيده عدة مرات وعاد إلى مكانه. شرد لبرهة، متذكرًا يوم أمس حين استقبلها مع والدته وتركوهم يدرسون معًا. لكنه بقي يراقبهم حتى انتهوا، ثم اقترح عليهم الخروج معًا. وافقت الصغيرة وسعدت. أفاق من شروده مناديًا عليها: "دهب". تطلعت إليه ثم قالت: شكرًا إنك وافقتي تخرجي معانا، اليوم كان جميل، ودهب كانت مبسوطة جدًا. ابتسمت له وأجابت: وأنا كمان مبسوطة، ووالدتك جميلة، وحبها دخل قلبي. أما دهب، اسمها عزيز عليا بس… تغير وجهها، فسألها: بس إيه؟ في حاجة حصلت؟ ترددت قليلاً، ثم أكملت بخفوت: مش هقدر أجيلكم تاني علشان أدي دروس لدهب، عمتي مش موافقة. نظر إليها صامتًا، ثم قالت بسرعة: هي مانعة بس، ممكن تيجي هي عندنا لو مش عند حضرتك مانع. قال وهو ينظر إلى ساعته: تعالي نكمل في الكافيه، ميعاد البريك. جلسوا في الكافيه يتناولون الغداء بصمت حتى قال: موافق، أجيب دهب عندك، وعمتك خايفة عليكِ. سعدت وقالت: بجد؟ طيب الحمد لله، قولت هتزعل. قال بتلقائية: أنا أزعل من الناس إلا أنتِ. يلا كلي بسرعة. ابتسم ثم عاد لتناول طعامه، وهي ما زالت تنظر إليه. رفع رأسه وقال مبتسمًا: قمور، صح؟ فخجلت ونظرت إلى طبقها. الفصل السادس عشر مرت الأيام، وكسر حاجز الرسمية بينهما. أصبحا أكثر ألفة، وزادت محادثاتهما التي غالبًا ما كانت عن دراسة الصغيرة. لكنهما تبادلا الاهتمام في أمور أخرى أيضًا. كان يلاحظ اهتمامها، وكلما أراد الحديث عن الماضي يتراجع خوفًا عليها. هي أيضًا بدأت تشعر بمشاعره من نظراته، وأدركت أنها بدأت تحبه. لم تستطع أن تمضي يومًا دون رؤيته، حتى في يوم عطلتها كانت تراه في منزل عمتها. تعلقت بالصغيرة ووجدت في رعايتها لها تعويضًا عن طفولتها المفقودة. هي الآن تعيش أجمل قصة حب، تنتظر فقط أن يعترف هو أيضًا. في صباح اليوم التالي، دخل مكتبه شاردًا دون أن يحييها. فقالت: وعليكم السلام. رد بصوت مشغول: _ وعليكم السلام ورحمة الله وبركاته. آسف، بس مشغول شوية. ابتسمت وقالت: أنت متأخر ومشغول، في إيه؟ نظر إليها بضيق ثم قال: سيبيني دلوقتي، عندي شغل لازم أخلصه. بعدين نتكلم. هزت رأسها وابتعدت إلى مكتبها، وهو غادر بسرعة بعد فترة قصيرة. بعد مغادرته، تحدثت مع نفسها: "ماله؟ إيه اللي شاغله؟ خلصت أنا كمان وهمشي." بينما كان يقود إلى بنايته، تذكر حادثة الأمس: الفتاة التي ألقت نفسها أمام سيارته محاولة الانتحار. حين حاول اللحاق بها، هربت، لكنه أمسك بمعصمها بعنف وأجبرها على الركوب معه لتفسير ما حدث. توسلت إليه أن يسرع قبل أن يعثروا عليها، وانهارت بالبكاء، بوجه شاحب يكسوه كدمات. بصوت مرتجف أخبرته أنها هربت من والدها الذي أجبرها على الزواج من رجل يكبرها سنًا. طمأنها، فبدأت تسرد قصتها " من وفاة والدتها، وحياتها في الملجأ حتى الثامنة عشرة، ثم استغلال والدها لها بالعمل خادمة، وأخيرًا، زواجها قسرًا. أدخلها إلى منزله ليحميها، وحين عاد إلى سيارته، وجد نصف السلسلة التي كانت معها يوم أنقذها في طفولتها. عاد مسرعًا، طرق جرس شقتها، وعندما فتحت، سألها عن اسمها. قالت: "دهب." طلب منها بطاقة هويتها، وقرأ اسمها "دهب مصطفى المهدي". خرج مسرعًا، قلبه يغلي بالتساؤلات: "مين اللي في الشركة؟" قرر بدر مواجهة الطبيبة عهد، فاقتحم مكتبها رغم رفض السكرتيرة، فأصابها القلق وسألته عن السبب. بادرها قائلاً: "تعالي نكشف أوراقنا. مقابل إني أقطع العقد اللي بينّا، وننهي كل حاجة لو وافقتي تجاوبي بصراحة." نظرت إليه بتمعن وقالت: "موافقة، اسأل." أجاب: "عاوز أعرف سبب مرض قريبتك وندبة وشها، وشرطي الوحيد عشان أبعد عنكم نهائيًا إنك توريني ملفها كله." ترددت قليلاً وهي تطرق بالقلم، ثم قالت بتهكم: "يعني لو عرفت هتبعد عنها؟ التمثيلية اللي عملتها مش داخلة عقلي." فألقى بدر كل أوراقه، حكماً على نفسه بكشف كل شيء؛ قصّ عليها قصة إنقاذه لقريبتها وإهدائه لها سلسلته الفضية، واعترف بأن العقد كان وسيلة للبقاء قريبًا منها خوفًا من فقدانها مرة أخرى. ثم أكمل قائلاً: "دلوقتي حكيت لك كل حاجة... دورك." عبرت عهد عن حزنها على ابنة عمها دهب، التي تعلقت ببدر رغم تحذيرها لها. زفرت بضيق وبدأت تروي له الحقيقة دهب تعرضت لحادث سير مع والدتها، توفيت أمام عينيها، وحملت نفسها مسؤولية الحادث لأنها تركت يد والدتها أثناء عبور الطريق، ومنذ ذلك الحين تعيش تحت وطأة الذنب. ظهرت عليها تغييرات طفولية اعتبرناها عابرة، إلى أن تفاقمت حالتها مؤخرًا. وأكملت بلهجة مشوبة بالألم: "ماكنتش عاوزة حد يحكي لها عشان ما تزيدش الصدمة اللي عايشة فيها، خصوصًا إن علاقتها بوالدها بقت معقدة بعد زواجه بشهر من وفاة والدتها. ورغم إن مرات أبوها بتحبها، دهب رفضتها تمامًا، وده زوّد المشاكل بينها وبين والدها بعد...". توقفت عهد فجأة، فنظر إليها بدر قائلاً: كملي... بعد إيه؟ تنهدت عهد وأكملت: بعد ما عرفت إن مرات أبوها كانت حامل، ودهب حاولت توقعها من على السلم، ففقدت الجنين. عمّي اتصل بوالدتي وطلب منها تاخد دهب تعيش معانا لفترة عشان حالتها تهدأ، وفعلاً رفضت ترجع لبيت والدها من وقتها. وللأسف، لسه زعلانة منه إنه تزوج بعد وفاة والدتها، رغم محاولاته إنه يرجعها تعيش مع إخوتها من الأب. ابتلعت عهد ريقها وأكملت بهدوء: الندبة اللي في حاجبها فوق، دي من أثر الحادثة. يومها أصرت تعدي الشارع لوحدها، وأمها حاولت تلحقها لكن العربية خبطتهم. الأم أخدت الضربة الأكبر، ودهب وقعت على وشها، ومن يومها وهي مش حابة تفتكر الحادث. نوبات الهوس بتجيلها مرة في السنة أو لما تتعرض لصدمة تذكرها بالحادث، زي لما شافت إخوتها البنات وبدأت حالة من الغيرة، ففقدت السيطرة على نفسها. قدمت عهد الملف لبدر وقالت: وده الملف بتاعها، ممكن تتأكد بنفسك. بادر بقراءة الملف الذي أعطته إياه، ليتفاجأ بأن اسمها الحقيقي "داليدا" وليس "دهب". غضب بشدة وقال: إيه ده؟ مين دي؟ الملف ده مش لدهب؟ مين داليدا دي؟ أنتو بتخدعوني؟ ضرب الملف بقوة على الطاولة وأطلق غضبه: إنتِ بتضحكي عليّا! مين داليدا دي؟ جايبالي بيانات غلط؟ انفعلت عهد وأجابت بقوة: إنت اللي دخلت حياتنا بمزاجك، واسمها الحقيقي داليدا، أحنا بناديها دهب. مالك انت؟ إنت اللي أقنعت نفسك إنها حد تاني. شعر بدر بالصدمة والخداع، فجلس محاولاً استعادة هدوئه: آسف على انفعالي. بس ازاي مضت العقد باسم "دهب الهواري" وهي اسمها الحقيقي "داليدا الهواري"؟ وافرضي قدمت العقد للمحكمة عشان الشرط الجزائي، ده يبقى تزوير. بتوتر، قالت عهد لبدر إن داليدا تمر بحالات هوس تجعلها تقوم ببعض الحيل، ومنها تزوير بطاقة باسم "دهب الهواري" تستعملها فقط خلال نوبات الهوس. أوضحت له أن مهارتها في الرسم تتيح لها تقليد الخطوط ببراعة، مما سمح له بالحصول على توقيعها في تلك الحالة. وأضافت أن "دهب" كان الاسم الذي اختارته لها والدتها، واعتاد الجميع على مناداتها به، حتى في المدرسة، وأكدت أن كل المستندات الطبية تثبت حالتها. أغلق بدر عينيه للحظة، ثم أخرج العقد وسلمه لعهد قائلاً: اتفضلي، مش هسبب لها مشاكل تانية. غادر المكان، لكنه ظل شاردًا، يتأمل بطاقتي "دهب" و"داليدا" بحيرة. جلس في سيارته وحاول الاتصال بصديقه، وحين لم يُجب، بقي صامتًا، غارقًا في أفكاره. بعد ثلاثة أيام، كانت داليدا قلقة من غياب بدر خاصة أنه لم يحضر الدرس مع ابنته. قالت لعهد: حاسة إنه مش بخير، أول مرة ما يجيش الشركة يومين، أكيد حصل حاجة. عهد ردت ببرود: هو مش من عيلتنا، لو يجي أو ما يجيش. خليكي بعيدة عن مشاكله وركزي في شغلك. هزت داليدا رأسها قائلة بعناد: لأ، يا عهد، مقدرش أبعد عنه. حبيته، والله حبيته، وحاسّة إنه بيحبني. هو ما عملش حاجة وحشة معايا، وكل تعامله معايا كان محترم وراقي. عهد ردت بجفاء: هو مش مهتم بيكي، تعامله كان عشان بنته وبس. ما فيش حاجة مما تفكري فيه. داليدا نظرت لها بغضب، ثم تغيرت نظرتها إلى الحزن والشوق: مش ممكن تفهمي، لما كنا مع بعض ومع بنته، الناس فكرتنا عيلة واحدة، هو جنتل مان، وقلبي بيقولي إنه فيه حاجة. أنا مقدرش أبعد عنه. لازم أروح الشركة، حتى لو العقد ملهوش أهمية هروح برده. تركتها ودخلت غرفتها، ثم حاولت الاتصال به عدة مرات دون رد. شعرت بالغضب وألقت هاتفها على الطاولة: ياترى في إيه؟ خير يا رب. … . الفصل السابع عشر بعد أن تأكد بدر من صحة المعلومات التي جمعها عن "دهب"، قرر مقابلة والدها. قابل الرجل بعد سنوات، ولاحظ تغيره رغم تقدمه في العمر، لكن لسانه ظل سليطًا كما كان. بعد حديث طويل، وبعد تدخل عاصم، دفع له المبلغ الذي طلبه لترك أبنته وشأنها. ثم سأل عاصم بدر بابتسامة: هتتجوزها، صح؟ صدم من السؤال وأجاب بتوتر: مش عارف... الأمور مش واضحة لسه. فاق بدر من شروده متذكرًا الأيام الماضية، وانتبه لوجود ابنته داخل غرفته، عابسة وتتمتم: يلا يا بابي، هنتأخر على ميس دهب والدرس. أنا لابسة من بدري، مستنياك تلبس. لم يذهب بدر إلى الشركة منذ يومين، وكان عقله مشغولًا بالأحداث الأخيرة. فقط ذهب لجلب بعض الأغراض والملابس ثم عاد للمنزل. بينما ابنته كانت تنتظره لتذهب إلى درس ميس دهب. اقتربت منه قائلة: يلا يا بابي هنتأخر. ابتسم لها وقال: تعالي، هقولك حاجة حلوة. قول يا بابي. إيه رأيك لو تيجي معايا وتقابلي بنت هتحبيها أوي؟ ابنته، بحماس، قالت: ميس دهب صح؟ لأ، مش ميس دهب، هي اسمها دهب، وإن شاء الله هتحبيها. اعترضت وقالت: لأ! بحب ميس بتاعتي بس. غادرت بغضب، وهو تنهد قائلاً: عملتي إيه خليتي الكل يحبك كده؟ ثم ارتدى ملابسه، وخرج متجهًا إليها. دخل بدر إلى الشقة، فوجدها خارجة من المطبخ. قال مرحًا: وأنا أقول الروايح دي منين؟ طابخة لنا إيه النهاردة؟ توقفت للحظة، مسحت العرق عن جبينها، وقالت بتردد: أصلاً زهقت من القعدة، قلت أطبخ شوية. حضرتك عاوز تأكل؟ ياريت، جهزي الأكل، عايز أتكلم معاك شوية. هستناكي هنا. جلس على الأرائك بينما هرولت إلى المطبخ، وبعد قليل جلست أمامه. بدأ يتناول الطعام وقال: هايل، أكلك تحفة يا دهب. ثم نظر إليها وقال: كملي أكلك، عشان نكون أكلنا عيش وملح، ولا إيه؟ أجابته بتردد: حضرتك كنت هتكلمني في موضوع؟ _ الحمد لله، شبعت. الأكل جميل. أوقف الطعام، وقال: أنتي ناوية تعملي إيه لو اتحل موضوع جوازك؟ توقفت، ثم قالت بتوتر: مش عارفة، بس مش هرجع لأبويا تاني. هو بيكرهني. لو حضرتك تكرمت، سيبني كم يوم هنا لحد ما ألاقي شغل، بعدين همشي. مش هسبب لك أي إزعاج. نظر إليها بوجه جاد وقال: هتشتغلي ايه؟ عندك شهادة؟ أخفضت رأسها قليلاً وردت بتردد: كملت الثانوية بس، وأبويا منعني أكمل تعليمي. ممكن أشتغل أي حاجة، حتى بياعة في محل ملابس. أجاب بحسم: خلاص، موضوع والدك والعريس انتهى. مش هتمشي من هنا. هتكملِ تعليمك، ومافيش شغل برا. كل حاجة هتوصل لك هنا. فتحت فمها لتسأل عن التفاصيل، لكنه أوقفها بابتسامة مطمئنة وقال: اتصرفت مع صديقي الظابط وحلينا كل شيء. لو حابة تشتغلي، هشغلك عندي في الشركة، لكن برا لأ. همست بامتنان: شكراً، أنت شخص مثالي. عمري ما حد عاملني كويس كده. اتبهدلت كتير، والمفروض يكونوا سند، لكن دخلوني ملجأ ورجعت لهم تاني. هفضل شايلة جميلك طول عمري. مستعدة أشتغل خدامة عندك. احتدت نظراته وقال بحزم: ما سمعش كلمة خدامة تاني. ظل يطالعها لثوانٍ، ثم أخرج سلسلة من يده وقال: مش دي سلسلتك، صح؟ فجأة، انتزعتها منه بسرعة وقالت بغضب: جبتها منين؟ ابتسم وقال: لاقيتها في العربية. مالك، اضايقتي ليه كده؟ تلعثمت وزاغت عيناها، محتضنة القلادة وقالت: دي أمانة، مقدرش أبعادها عني. همست قبل أن تدخل، ثم ترك لها رسالة وغادر. دخلت الغرفة، ما زالت تمسك بالقلادة بإحكام. استلقت على الفراش، وأغلقت الغرفة عليها، ملتفة حول نفسها كطفل. عقليًا، كانت تسترجع لحظات صدمتها بعد حادث غرق أخيها، وفقدان والدتها أمام عينيها. استفاقت لتجد نفسها في مكان غريب، محاطة بأناس وأطفال لا تعرفهم، تبحث عن أخيها الذي كان يمثل لها الأمان . تلمست القلادة حول عنقها، والتي كانت قد أهدتها لها شخص عزيز في لحظة ضعف، ولم تتركها منذ ذلك اليوم. كانت تمثل لها ذكريات الأمان والراحة وسط هذا الاضطراب. وبينما كانت غارقة في أفكارها، وصلتها رسالة على هاتفها: فجأة، قطع صوت هاتفها الصمت، وكانت رسالة منه: "أنا مشيت، خدي راحتك. الأكل جميل، هبعتلك شوية حاجات، واطلعيهم مع الحارس. بلغته يضرب الجرس ويسيب الحاجة. بعد شوية افتحي وخديها، وانا هخلص لك باقي إجراءات الدراسة. خلي بالك من نفسك." بقلم شروق مصطفى وصل إلى منزله، ألقى بنفسه على الفراش، ثم نظر إلى هاتفه. تجاهل اتصالاتها طوال اليوم، وزفر بضيق وهو يكتب: "أنا كويس، متقلقيش. بكرة جاي الشركة. سلام." ثم ترك الهاتف وغفى، لكنه لم يجد راحة بسبب تفكيره المستمر. في الجهة الأخرى، كانت "ذهبيتنا" تحتضن هاتفها بسعادة بعد أن وصلتها رسالته. همست بحب: "الحمدلله يا حبيبي، أقدر أنام دلوقتي. إمتى يجي الصبح؟ عشان أشوفك." ... في صباح اليوم التالي، بعد انتهائها من دراستها، وصلت "دهب" مسرعة إلى الشركة لتلتقي به. جلست تنتظر دخوله، عينيها تراقب الباب حتى رآته قادمًا. تطلع إليها بدهشة، ثم توقف عند السكرتيرة وتحدث معها قليلاً قبل أن يقترب منها. ألقى السلام عليها بجفاء، ثم جلس في مكانه. ابتسمت له بسعادة وسألته: حمدلله على السلامة، كنت فين؟ قلقت عليك. نظر إليها بحذر، وقال بصلابة: مفيش حاجة، كنت بريح شوية من الشغل. جلست أمامه، وتحدثت بحب: مش متعودة تبعد عني كده... ماتغيبش تاني. لكنها انتبهت لتغير ملامح وجهه، فعدلت كلامها بسرعة: قصدي ماتبعدش عن الشغل علينا. ثم قال لها: استني، في حاجة مهمة عاوز أقولك. توقفت، مبتسمة، في انتظار ما سيقوله، لكنه فجأة قال: طلبت من السكرتيرة تنقل مكتبك مع الفريق برة، زي ما طلبتي. صُدمت وقالت بسرعة: آه، صح، بس دلوقتي مفيش مشكلة أكمل هنا معاك. أجاب بسخرية: لا، كان لازم من الأول. مكتبك برة أفضل. جلست مشاعرها في حيرة. كان يتقرب منها، ثم فجأة ابتعد. تساءلت في نفسها عن سبب هذا التغيير المفاجئ في تصرفاته. سألته بقلق: ليه مجبتش دهب امبارح؟ كان عندها درس، في حاجة ضايقتك؟ أشار لها بالجلوس، ثم ابتسم بهدوء: لا مفيش حاجة، دهب بتحبك وهتفضل تحبك، بس حبيت أريحها شوية، ما أضغطش عليها دلوقتي، كفاية عليها المدرسة. أجابته بتردد: لكن والدتك هي اللي اقترحت، وأنا مش بضغط عليها، وبالعكس هي استجابتها رائعة. أخذ نفساً عميقاً، وقال بحسم: زي ما قلتلك، مفيش داعي للضغط عليها دلوقتي. وبكرة مكتبك هيتنقل مع التيم، يلا عشان تخلصي شغلك. ثم انشغل بهاتفه، تاركاً إياها في حالة من الارتباك. كان يظن أنه يتصرف بحكمة، لكنه لم يعلم أنها كانت تشعر بحبه في كل نظرة. نهض ليغادر، ثم عاد قائلاً: خلصي التصاميم وابعتيهم للمصنع، سلام. تسارعت دهب خلفه قائلة: رايح فين يا بدر؟ لسه بدري. أجابها بغضب مكتوم: في إيه يا دهب؟ ناسيه نفسك؟ كملي شغلك. ابتسم ابتسامة صفراء ثم غادر. شعرت دهب بالحزن من تغير معاملته ودمعت عيناها، لكنها دخلت المكتب تكمل عملها. بعد ساعات، سلمت التصاميم وخرجت إلى منزلها، حيث قابلتها عمتها التي لاحظت انتفاخ جفونها وسألتها: مالك؟ أجابت دهب بتردد: لا دا من الجو بس. عرضت عليها قطرة لعينها وطلبت منها أن ترتاح حتى يحضر الغداء. عندما وصل بدر إلى منزله، دق الجرس، ففتحت دهب الباب، وأعجب بجمالها وأناقتها، قائلاً: واو، إيه الجمال ده؟ أجابته بدهشة وهي تخرج معه: مش ذوقك أكيد زي صاحبه، لكن ما قلتش في الرسالة إني لازم ألبس، هنروح فين؟ ابتسم بدر وفتح لها باب السيارة قائلاً: هنتمشوا شوية، لازم تفرجي على الدنيا، زهقتِ من القعدة في البيت؟ شعرت دهب بالتوتر وقالت: بس خايفة بابا يشوفني... أجاب بدر مطمئنًا: مفيش داعي للقلق، موضوع بابا والراجل ده اتحل خلاص أنا اتكفلت بالموضوع، انتهى، ما تشغليش بالك، وبالمناسبة، أنا بقدم ورقك للجامعة والشغل موجود، مكتبك جاهز. بدت متفاجئة وسعيدة، وقالت: بجد؟ كل ده عشاني؟ مش عارفة أشكرك إزاي، بس ليه بتعمل كل ده؟ ضحك بدر وأجاب: عادي، بساعد الناس كلهم، بس إنتِ مميزة شوية عنهم. استفسرت بدهشة: إزاي؟ هفهمك بعدين، كله في وقته، يلا بينا، وصلنا، هنتغدى الأول وبعدين هوديكي رحلة نيلية. دخلوا إلى مطعم فاخر، وجلسوا معًا يتناولون الطعام، ولم يلاحظوا الكاميرات التي كانت تلتقط صورهم منذ اللحظة التي ركبوا فيها السيارة حتى وصولهم إلى المطعم. كان الجو مليئًا بالضحك والسعادة، واستمتعوا بوقتهم في الرحلة النيلية. الفصل الثامن عشر في صباح اليوم التالي، وصلت دهب إلى الشركة، وعندما اقتربت من مكتب بدر، أوقفتها السكرتيرة وأخبرتها أن مكتبها قد تم نقله مع باقي الفريق إلى مكان آخر. حاولت دهب أن تجد بعض الأمل أو أن يتراجع عن قراره، لكنها مضت نحو مكتبها الجديد. دخلت بسرعة إلى مكتب بدر لتأخذ أغراضها، وحين لفت انتباهها قطعة زجاجية صغيرة بداخلها عروسين، تخيلت نفسها معه في لحظة رومانسية، لكن صوت بدر قطع تأملها، سألها عن سبب وجودها، فاجابته بتلعثم، مبررة أنها كانت تجمع حاجاتها. ثم سألت إن كان يحتاج شيئًا قبل أن تذهب، لكنه أجابها بجفاء وأدار ظهره، طالبًا منها إغلاق الباب خلفها. شعرت بالخذلان والألم، لكنها خرجت سريعًا وهي تحمل مشاعر مختلطة من الحزن. بينما بدر، الذي كان يتألم لرؤيتها تبتعد، حاول أن يركز في عمله. قرر الخروج لتناول الغداء، وعندما جلس في المطعم، لم يجدها، فبقي يأكل في صمت. أما دهب، فقد كانت مشغولة في عملها ولم تلاحظ غياب فريقها. وبعد فترة من الضغط، خرجت لتأخذ قسطًا من الراحة، وفي طريقها إلى المطبخ، رأته أمامها، لكنه لم يلتفت إليها. نظرت إليه للحظة، ثم رأته يغلق الستائر، ويعود إلى مكتبه دون أن يتحدث معها. دهب شعرت بالحزن بسبب جفاء بدر، فذهبت إلى المطعم لتأخذ قهوة ثم عادت إلى مكتبها. لاحظت أن ستائر مكتبه مازالت مغلقة. دخل جاسر وسأله عن سبب تغييره، خاصة بعد انتقال دهب إلى مكتب آخر. بدر أخبره أنه اكتشف أن دهب ليست هي نفسها، بل اسمها الحقيقي "داليدا"، وأنه اكتشف تزويرًا في أوراقها. رغم خيبة أمله، قرر أن يعيدها للعمل في الشركة. جاسر نصحه بتخلي عن "داليدا"، لكنه قرر أن يُعيدها للعمل خوفا رجوعها لحالة جديدة. في المساء، جلست عهد ووالدتها أمام التلفاز تشاهدان مسلسلهما المفضل، فقالت والدتها: "قومي نادي دهب تتفرج بدل قعادها لوحدها كده من وقت ما جت." نهضت عهد لتبحث عنها، وعندما دخلت غرفتها، وجدتها مظلمة، ما عدا نور خافت من لمبة السهاري. أدركت أنها كانت نائمة، ولكنها سمعت بكاء خفيف، فتوقفت لتتأكد، ودخلت مغلقة الباب خلفها وجلست بجانبها، تحتضنها وتهمس: "دهب حبيبتي، مالك؟ قومي كلميني." لكن دهب رفضت ودفعت وجهها بعيدًا، وقالت: "سبيني لوحدي، مش عاوزه أشوف حد." لكن عهد استمرت في تهدئتها وقالت: " فضفضي ماتكتميش جواكي." أخذت دهب تذرف الدموع وقالت بتقطع: "بيبعدني عنه يا عهد، مش هيجيب بنته هنا تاني، طردني من مكتبه، بقى يعاملني بجفاء بعد ما كان بيقرب مني ويخاف عليّ." ثم انفجرت قائلة: "مش بدر ده، ده واحد تاني، أنا تعلقت بيه أوي، قوليلي أعمل إيه؟ كيف أخليه يحبني تاني؟ أنا حاسة إن قلبي هيتوقف لو باعد عني أكتر." حاولت عهد تهدئتها، ولكنها قالت لها بحزم: "لازم تسيبي الشركة، لازم تقوي قلبك." لكن دهب رفضت، وقالت: "مش هقدر، بحبه ومش هقدر أمشي، لو حتى شفته من بعيد." ثم أضافت: "المهم إني في الشركة معاه، وهو أكيد مضايق من حاجة، فممكن يكون ده السبب، وأنا متأكدة إنه هيرجعني تاني." عهد غادرت الغرفة وبدأت تفكر في كيفية التعامل مع الموقف، ثم رجعت إلى والدتها التي تساءلت عن حال دهب، فقالت: "دهب نامت." ...... في صباح اليوم التالي، كانت دهب تجلس مع فريقها في الشركة، مختارة مكانًا يتيح لها رؤية مكتب بدر. كانت تنتظر قدومه بفارغ الصبر، تأملًا في أن يهدأ قلبها ويطلب منها العودة إلى مكتبه أو يستدعيها لأي سبب. كانت تخبط القلم أمامها بتوتر، حتى تفاجأت برؤيته مع فتاة أخرى، يبتسم لها بينما يعرفها على السكرتارية. في نفس اليوم، ذهب بدر لإحضار الفتاة التي بدأت عملها في شركته. بينما كان ينتظرها أسفل البناية، تلقى مكالمة، وعندما أنهى الحديث، تحدث بضيق قائلاً: "خلاص كده، ولا فيه حاجة تانية؟ طيب، سلام." بعد لحظات، نزلت دهب مبتسمة له بهدوء، وتبادلا التحية. صعدا معًا إلى الشركة، حيث أدخلها بدر إلى مكتبه، مشيرًا لها إلى مكتبها الجديد. اقتربت بدهشة، وقالت بتردد: "بس أنا هع..." ولكن قبل أن تكمل، فُتح الباب فجأة. شعرت دهب بالصدمة عندما رأت الفتاة التي دخلت مع بدر إلى مكتبه. تركت ما بيدها وخرجت بسرعة لتسأل السكرتيرة: "مين دي؟ دي أخته؟" أجابتها منى ببرود: "لا، دي البنت الجديدة، هتشتغل معاه، روحي على مكتبك." شعرت بالغيرة والقلق، خصوصًا عندما رأته يشير إلى مكتبها القديم، فغادرت غرفة السكرتيرة غاضبة، متوجهة إلى مكتب بدر. دخلت بغضب، وصرخت: " "مين دي؟ وازاي تقعدها على مكتبي؟ عشان كده نقلتني بره؟" نهض بدر بغضب، وعيناه تتقدان شراسة، ضرب بقبضته على المكتب وقال: "إزاي تدخلي بالطريقة دي؟! هو أنا اشتريته بفلوسك ولا إيه؟ وانتي مالك؟ امشي على مكتبك!" كانت كلماته قاسية، لكن، رغم التوتر، قالت بصوت مرتعش: "طب وأنا إيه؟ خلاص كده؟ باعدني عنك وعن بنتك كمان؟" أجابها بدر بوجوم: "مش فاهم تقصدي إيه، كان فيه حاجة بينا عشان أبعد؟ وبنتي مالها في الشغل ده؟ امشي من قدامي وبلاش تعملي مشاكل أكتر. كانت كلماته كالصاعقة على قلبها، وجسدها يرتجف من وقع الكلمات. حاولت تمالك نفسها، لكن مع كل ثانية كانت تشعر أن النهاية قد اقتربت. حاولت تمسك بأخر أمل، وقالت: "بس أنا لو همشي، همشي من الشركة كلها يا بدر!" كانت تنتظر منه كلمة تؤكد أنها ما زالت تعني له شيئًا، لكنها صُدمت عندما رأت ابتسامته الساخرة وهو يمزق صورة من العقد أمام عينيها. قال لها ببرود: "أنتِ حابة تعملي دراما؟": عدي على الحسابات أستلمي باقي مرتبك. أخفضت دهب عينيها خجلًا، غير مصدقة ما يحدث، وقالت بتألم: "أسفة ليكم، فهمت غلط، هسيبكم براحتكم." ثم التفت لتغادر، لكنها همست للفتاة التي بجواره قبل مغادرتها: "أوعي تتعلقي بأهتمامه، مصيرك هيكون زيي." غادرت دهب الشركة، وقلبها مكسور، جلست على ضفاف النيل، متأثرة بما حدث، وهي تذرف الدموع. لكن شخصًا غريبًا جلس بجانبها، ربت على كتفها بحنان زائف وقال: "معلش، الصدمة في الأول وحشة، بس واضح أنه كان هيخذلك، هو مش معقول يدخلك شركته بعد اللي عملتيه." شروق مصطفى مسحت دمعتها وقالت بتوتر: "إنتِ بتقولي إيه؟ أنتي مجنونة؟" ردت الأخرى ضاحكة باستهزاء: "أنا المجنونة؟ مش مهم، المشكلة مش فيكِ، المشكلة في أنكِ السبب في طردي، ومع ذلك صعبتِ عليا هقولك أنك مضحوك عليكي." أخرجت"ميرا" مجموعة من الصور لبدر مع الفتاة الجديدة في رحلة نيلية، والمطعم وهما متقاربان جدًا. ظلّت "داليدا" صامتة لوهلة، مصدومة، حتى أن الدمعة أبت أن تنزل. قالت الأخيرة وهي تضحك بصوت عالٍ: على فكرة، أنتِ طيبة جدًا يا "داليدا". عارفة مين دي؟ ماتستغربيش، أنا عارفة كل شيء عنك، لأنني كنت ناوية أنتقم منك. كنت برسم عليه وفي الآخر انطردت بسببك! بس سبحان الله، أخذت حقي لما سابك عشان دي. ثم شرحت لها كل شيء، مشيرة للتشابه بينهما في الاسم والشكل، وتوقيت الحادث. اكتشفت داليدا السبب، فابتعد عنها، وبدأ يتقرب من تلك الفتاة. همست داليدا، وهي تشعر بالاختناق: قصدك العقد كان عشان يقربني منه؟ لأنه كان فاكرني هي؟ واستغنى عني لما لاقاها؟ طيب، طيب، أنا ذنبي إيه في كل ده؟ تنهدت، غير قادرة على استيعاب ما حدث. فقالت: أنا ممكن أكون آذيتك زي ما بتقولي، لكن ماكنتش أعرف، بعتذر لو كنت السبب في قطع عيشك، بس مش عدوة ليك، والدليل الصور دي. وبالنسبة للحب، لا أنا ولا أنتِ لنا نصيب فيه. أمسكت داليدا بالصورة، وعصرتها بين يديها، ثم نهضت لتغادر، وتركت الصور تتناثر على الأرض. تغيرت حالتها من انهيار إلى جمود، ما أثار استغراب ميرا التي نظرت إليها وهي تذهب. همست لنفسها: كان لازم أحرق دمك زي ما حرقت لي دمي. وصلها اتصال من مجهول، فأجابته بملل: خلاص، مفيش فايدة. مهمتك انتهت، أنا جبت حقي منهم. سلام. أغلقت الهاتف، ثم تذكرت مرشدها الذي جمع كل المعلومات عنها وعن بدر، ومراقبته لكل خطواتهم منذ بداية اللقاء، حتى اكتشافه لحقيقة ما يحدث. الفصل التاسع عشر وصلت إلى المنزل، وجهها خالي من التعبير، جلست بجانب عمتها التي كانت تثرثر، لكن دموعها أبت أن تنزل. كانت تشعر أنها كانت مجرد "لعبة" بالنسبة لبدر، وعندما ملّ منها تركها، لم تلتفت لثرثرة عمتها التي كانت تناديها بأسمها للأطمئنان عليها، ابتسمت ابتسامة ساخرة، ثم نهضت بهدوء، وقالت قبل أن تدخل غرفتها: عمري ما كنت كويسة، إلا النهاردة، واسمي "ورد"، مش دهب. لطمت عمتها صدرها، وقالت بصدمة: يالهوي، جالها هوس تاني! … .. في المكتب، شعر بدر بالضيق مما فعله، وقالت هي بتردد: شكلي سببت لك مشاكل. ممكن أمشي عادي، وهي ت... استدار بدر، هاتفا بضيق: مش عاوز أسمعك تقولي تمشي تاني، مفهوم؟ كانت كلماته حاسمة، مما جعلها تتلعثم، خافضة عينيها بخجل: هي بتحبك، وأنت أحرجتها. مسح جبينه، وقال: مكنش قصدي أحرجها. هي فكرت اهتمامي بها غلط. شعرت بالحيرة، ثم سألته بصمت: ليه جبتني هنا؟ نظر إليها ثم قال: أنتِ مش زيها. هفهمك في وقتها، وبالنسبة للشغل، هيفيدك كتير. وأنا هساعدك. --- حل المساء، وما زالت تنتظر ابنتها أن تنهي عملها. بعد لحظات، عادت الابنة إلى المنزل، دلفت إلى غرفتها، ولكنها فوجئت بعدم وجود أحد هناك. هرعت إلى والدتها، طرقت الباب، ودخلت لتجدها تنهي صلاة العشاء: تقبل الله يا أمي. منا ومنكم يا حبيبتي، ها كلمتيها؟ إيه اللي حصل؟ أجابتها الابنة: ماما، ما لقيتش حد في الأوضة. دي خرجت، أنتي ما شوفتهاش؟ ردت الأم بذهول: خرجت؟ من وقت ما جاءت وهي في غرفتها، لم تقل غير "أنا ورد مين دهب دي". تفتكري حصل إيه؟ هزت الابنة كتفيها بقلق، حزينة على حال ابنة عمها التي تعلق قلبها برجل تركها فجأة. نفخت وجنتيها بضيق، غير قادرة على الوصول إلى عقلها، وقالت: هكلمها، ولو ما ردتش نستنى لحد ما تيجي، ونعرف خير إن شاء الله. … . في مكان آخر، كان بدر منشغلاً في عمله، مضطرباً بسبب شعوره بالذنب تجاه "دهب". ورغم وجود فتاته بجانبه، لم يستطع تجاهل وجه "دهب" الذي يلوح أمامه. بعد العمل، اصطحب فتاته إلى مطعم على النيل، المكان الذي كان يجلس فيه سابقًا مع "دهب" وابنته. وأثناء انتظارهما للطعام، اقتربت منهما بائعة صغيرة بثياب مهترئة. نظرت إليها الفتاة باستهجان، ودفعتها بعيداً، مما أغضب بدر الذي عرف الفتاة الصغيرة ولام فتاته على معاملتها. بعد مغادرة المطعم، عاد بدر بالذاكرة إلى اليوم الذي زار فيه مع "دهب" وابنته هذا المكان. في ذلك اليوم، أصرت "دهب" على مساعدة الفتاة ووالدتها المريضة، مما ترك في قلب بدر شعوراً بالاحترام تجاه عفويتها وطيبتها. عند عودته إلى المنزل، بدا على بدر التشتت، ولاحظت والدته همومه وسألته عن "دهب".أجاب بغير وعي: راحت لحالها، خلاص... كل شيء انتهى. بعد حديث مع والده الذي نصحه باتباع قلبه، تركهم بدر وأدرك أنه بين نارين: قلبه الذي يحنّ لـ"دهب"، وعقله الذي يلزمه برعاية الفتاة التي عانى كثيراً حتى يجدها. دخل ليطمئن على ابنته النائمة، وقبّل جبينها، ثم اتجه إلى غرفته، يشعر بضغط خانق يكاد يكتم أنفاسه. أخذ حمامًا باردًا، آملًا أن يهدأ توتره، ثم تمدد على السرير ناظرًا إلى السقف، مشوش الذهن. عقله يصرخ فيه ليعوض الفتاة التي ظل ينتظرها لسنوات، بينما قلبه يحن إلى "ذهبيته" التي ودّعته بدموعها. أخيرًا قرر إرضاء عقله والانفصال عن "الذهبية"، لكنه ظل يتململ في فراشه حتى غلبه النعاس. على الجانب الآخر، تسللت "داليدا" خارج المنزل، تشعر أن حياتها تغيرت بلحظة، ولم تجد سبيلًا لتهدئة ألمها.

مقالات ذات صلة

الحقيقه المره

الوردانى 2

جوه المعرض.. لمشيره محمد

اتهام….. مشيره محمد

انا كيان

🛑🛑🛑🛑

اترك تعليقاً إلغاء الرد