مفتاح نحاس
سوقت بسرعة جنونية، ووصلت للزمالك في أقل من ثلث ساعة. ركنت العربية ونزلت جري، طلعت السلالم الرخام بتاعة العمارة القديمة وأنا مش شايف قدامي.
فتحت باب المكتب من غير ما أخبط.
المنظر كان كفيل يوقف قلبي. أمي كانت قاعدة قصاد الأستاذ فاروق، وعلى الترابيزة بينهم باسبور فريدة، والملف الأسود بتاع عقود الورث، وورقة ثانية عليها أختام حمرا.
أمي أول ما شافتني، أطرافها اتجمدت، واللون هرب من وشها تماماً. الفنجان اللي كان في إيدها اتهز والمية صبت على الطاولة.
«شريف؟! انت.. انت مش مفروض تكون في الطيارة لأسيوط دلوقتي؟!»
مشيت بخطوات بطيئة وتلقائية لحد ما وقفت فوق رأسها، وسحبت الباسبور والملف من على الترابيزة وحطيتهم في جيبي:
«الطيارة اتلغت يا أمي.. أصل فريدة نسيت ترجع المفتاح النحاس جيب الجاكيت بتاعي.»
الأستاذ فاروق قام من كرسيه وهو متوتر وبيعدل نظارته: «يا شريف يا بني اهدا بس، والدتك كانت جاية تعيد ترتيب بعض الأوراق الخاصة بفريدة للحفاظ على حقوقها..»
زعقت فيه بصوت هز أرجان المكان: «حقوق مين يا أستاذ فاروق؟! تذاكر الغردقة اللي محجوزة لبكرة الصبح دي لحساب مين؟! الملحوظة اللي مكتوب فيها أبوها مش هيكون في المحافظة دي معناه إيه؟!»
أمي قامت وقفت، وعينيها تحولت من الخوف للجمود والقسوة، القسوة اللي عمرها ما ورتهاني في حياتها:
«أيوه يا شريف! عملت كده عشان أنقذ البنت منك ومن العيلة دي! أنت من يوم ما نور ماتت وأنت مش هنا.. عايش في ذكرياتك وشغلك، وسايب البنت تضيع! التركة دي حق البنت، وأنا الأولى إني أديرها وأمن مستقبلها بعيد عن استهتارك!»
ضحكت بمرارة ودموعي كانت محبوسة في عيني:
«أنا مستهتر يا أمي؟ أنا اللي شغال ليل بنهار عشان أوفرلها أحسن عيشة؟ ولا أنتِ اللي طمعانة في إدارة العمارة وأسهم الشركة اللي نور كتبتها باسم البنت؟ نور الله يرحمها كانت فاهمة صح.. كانت عارفة إنك مش شايفانا غير أرقام وفلوس، عشان كده كتبت البند ده في وصيتها!»
وش أمي اتغير تماماً أول ما سمعت سيرة الوصية: «وصية إيه؟ نور مكنتش..»
«نور كانت عارفة كل حاجة!» قاطعتها وأنا بقرب منها: «كنتِ فاكرة إني مش هعرف؟ كنتِ فاكرة إنك لما تخلي بنت عندها خمس سنين تتسحب في الضلمة وتسرق مفتاح أبوها، إن ربنا مش هيكشفك؟ أنتِ علمِتي البنت الكذب والخوف! هددتيها إنك هتمشيها لو حكتلي!»
