فاصل ولن نعود
حصرى مشيره_محمد
سارة كانت بتسمعني ووشها بيتغير مع كل كلمة
وفي الآخر قالتلي بغضب
\- والله لأخليه يندم على كل لحظة خوّفك فيها
مسكت إيديها وقلت
\- لا يا سارة أنا مش عايزة أنتقم من حد أنا عايزة أعيش بس
سارة بصتلي بحزن وقالت
\- طيب هتعملي إيه دلوقتي
بصيت قدامي وقلت
\- هبدأ من الصفر
ماكنتش عارفة إن البداية الجديدة دي هتكون أصعب من أي حاجة مريت بيها
لكن لأول مرة في حياتي كنت باخد قراراتي بنفسي
### البداية الجديدة
رجعت مع سارة للقاهرة وقعدت معاها في شقتها الصغيرة
بدأت أطلع أوراقي وأدور على شغل
اشتغلت في الأول في محل ملابس وبعدها اشتغلت في شركة صغيرة بتبيع منتجات يدوية على الإنترنت
كنت برجع البيت تعبانة وكل اللي في جيبي بالعافية يكفيني مصاريفي
لكن كنت بنام مرتاحة
محدش بيزعقلي
محدش بيصورني وأنا بعيط عشان يضحك الناس عليا
ومحدش بيقولي إن كرامتي تمنها أقل من كام مشاهدة على الإنترنت
بعد ست شهور بدأت أتعلم تصميم المنتجات والتسويق الإلكتروني
اكتشفت إني بحب الشغل ده وبعرف أتعامل مع الناس وأقنعهم بالمنتجات من غير ما أكذب عليهم
مديري في الشركة لاحظ اجتهادي وفي يوم طلبني في مكتبه
قاللي
\- يا ندى انتي بتتعلمي بسرعة وعندك أفكار كويسة جدا إيه رأيك تمسكي فريق المبيعات أونلاين
بصيتله بعدم تصديق
\- أنا يا فندم
ضحك وقال
\- أيوه انتي هو أنا بكلم نفسي
خرجت من مكتبه وأنا حاسة إن في حاجة جوايا رجعت للحياة
لأول مرة من سنين حسيت إن لي قيمة مش عشان أنا مرات حد ولا عشان حد بيحبني
لكن عشان أنا ندى
الإنسانة اللي تقدر تنجح وتبني لنفسها حياة
ومع مرور الوقت قدرت أوفر مبلغ صغير وبدأت مشروع خاص بيا من البيت
كنت ببيع منتجات يدوية وشنط وإكسسوارات من تصميمي
في البداية كنت بجهز الطلبات على ترابيزة السفرة وبوصلها بنفسي لشركة الشحن
وسارة كانت بتساعدني بعد شغلها
كانت كل ما تشوفني تعبانة تقوللي
\- يا بنتي نامي شوية انتي هتخلصي على نفسك
وأنا أضحك وأقولها
\- سيبيني بس أوصل لحاجة تخلي كل التعب ده يستاهل
وبالفعل بعد سنتين المشروع كبر وبقى عندي مخزن صغير وفريق من البنات اللي بيشتغلوا معايا
كنت حريصة إن أي بنت تشتغل عندي تاخد حقها كامل وإن محدش يستغل احتياجها للشغل
لأني عارفة كويس يعني إيه الواحد يبقى محتاج ومش لاقي حد يقف جنبه
وفي يوم من الأيام وأنا في اجتماع مع مستثمر مصري اسمه عمر الشافعي عرض عليا إنه يدخل شريك معايا عشان نوسع المشروع ونفتح فروع في محافظات مختلفة
