فاصل ولن نعود
حصرى مشيره_محمد
بعد خمس سنين رجع يدور عليا ولما شافني عرف إن المقلب اللي عمله دمر حياته
الست اللي ركبت معاها العربية كان اسمها أمينة وكانت ست في أواخر الخمسينات وملامحها فيها طيبة غريبة تخليك تحس إنك تعرفها من سنين
بعد ما مشينا مسافة طويلة بصتلي بطرف عينها وقالتلي
\- انتي بقالك ساعة ساكتة يا بنتي هو انتي هربانة من حد
بصيت من الشباك ودموعي اللي كنت حابساها طول الوقت نزلت غصب عني
قلت لها بصوت مبحوح
\- انا مش هربانة يا طنط انا بس مش عايزة ارجع للمكان اللي كنت فيه
أمينة هزت راسها وقالت بهدوء
\- ساعات الواحد مابيكونش هربان من مكان قد ما بيكون هربان من وجع مش قادر يستحمله
الكلمتين دول خلوني انهار في العياط
فضلت تعيط معايا من غير ما تسألني عن تفاصيل أكتر لحد ما وصلنا بلد صغيرة في محافظة المنيا
هناك كانت عندها شقة بسيطة فوق بيت ابنها اللي مسافر شغله في القاهرة
أصرت إني أقعد عندها كام يوم لحد ما أعرف هعمل إيه
وفي أول ليلة ليا هناك قعدت على طرف السرير وبصيت لإيدي الفاضية
لا فلوس ولا بطاقة شخصية ولا حتى هدوم أغير بيها هدومي
كل حاجة كانت مع كريم في العربية
افتكرت يوم فرحنا لما مسك إيدي قدام الناس وقاللي
\- أوعدك إني عمري ما هسيبك لوحدك مهما حصل
ضحكت وقتها وقلتله
\- وأنا أوعدك إني هفضل جنبك في الحلوة والمرة
ماكنتش أعرف إن أول واحد هيسيبني في عز ضعفي هو نفسه اللي وعدني بالأمان
تاني يوم أمينة خدتني معاها لمركز الشرطة عشان أبلغ عن اللي حصل وأحاول أوصل لأهلي وأطلع بدل فاقد لأوراقي
لكن المشكلة إني ماكنتش فاكرة أرقام حد من أهلي لأن كريم من أول الجواز كان بيضايق لما أكلمهم كتير وخلاني بالتدريج أبعد عنهم
كنت فاكرة إني بعمل كده عشان بيتي يستقر
لكن اكتشفت إني كنت بعزل نفسي عن الناس اللي ممكن تسندني وقت الشدة
بعد أيام من المحاولات قدرت أوصل لأختي من خلال حساب قديم ليا على الإنترنت
أول ما سمعت صوتها قالتلي وهي بتعيط
\- ندى انتي فين يا مجنونة انتي اختفيتي ليه كلنا قلبنا الدنيا عليكي
ماقدرتش أرد غير بكلمتين
\- أنا آسفة يا سارة
\- آسفة على إيه انتي فين بس قوليلي وأنا جاية لك
وبعد يومين كانت أختي قدامي في شقة أمينة
أول ما شافتني حضنتني جامد وقالتلي
\- كريم عمل فيكي إيه
حكيتلها كل حاجة من أول ما نزلت محطة البنزين لحد ما كسرت الشريحة
