فاصل ولن نعود
حصرى مشيره_محمد
قرب مني خطوتين وقال
\- انتي عايشة فين كل السنين دي أنا دورت عليكي في كل مكان
ضحكت ضحكة صغيرة من غير فرحة
\- غريبة إنك افتكرت تدور عليا بعد ما سبتني من غير فلوس ولا موبايل في مكان معرفوش
وشه اتغير وقال بسرعة
\- يا ندى انتي فاهمة الموضوع غلط والله كان مقلب وإحنا كنا هنرجعلك
رديت عليه
\- مقلب
الكلمة خرجت من بقي باردة لدرجة إنه سكت
كملت وأنا ببص في عينيه
\- انت فاكر إن المشكلة إنك سبتني على الطريق بس المشكلة إنك كنت شايف خوفي وضحكي الناس عليا حاجة مسلية تستاهل تتصور وتتذاع
كريم نزل عينه وقال
\- أنا عارف إني غلطت بس وقتها كنا صغيرين ومتهورين
قلتله
\- إحنا كنا متجوزين يا كريم مش أطفال في مدرسة
حاول يقرب مني أكتر لكنه وقف لما شاف عمر واقف جنبي
بصله وسألني
\- مين ده
رديت بهدوء
\- عمر الشافعي جوزي
كريم بصلي كأنه مش مستوعب الكلمة
\- جوزك
عمر مد إيده وسلم عليه بأدب وقال
\- أهلا وسهلا
لكن كريم ما ردش السلام بشكل طبيعي لأنه كان مركز معايا أنا
بصلي وقال
\- انتي اتجوزتي بعدي
عمر رد المرة دي بنبرة هادية لكنها حاسمة
\- أعتقد إن ده شيء طبيعي بعد خمس سنين يا أستاذ كريم
كريم تجاهله وبصلي روايات مشيره محمد
\- ندى أنا محتاج أتكلم معاكي لوحدنا
قلتله
\- مفيش كلام بينا محتاج يتقال
قال بسرعة
\- لا فيه حاجات كتير لازم تعرفيها
وفي اللحظة دي خرجت من المكتب بنت صغيرة عندها حوالي أربع سنين وكانت بتنادي
\- ماما ندى
جريت عليا ورفعت إيديها عشان أشيلها
شيلتها وبوستها على خدها
كريم فضل باصص لنا وهو مش فاهم
البنت كانت بنت سارة الصغيرة اللي كانت بتستنى ماماها في مكتبي لحد ما تخلص شغلها لأن الحضانة كانت قريبة من الشركة
لكن قبل ما أشرح أي حاجة سمعنا صوت راجل تاني من ناحية الاستقبال
\- أستاذ كريم حضرتك هنا من بدري
كريم لف بسرعة
كان حسام أخوه واقف عند الباب
أول ما حسام شافني وشه اصفر
أما معتز اللي كان داخل وراه فوقف مكانه كأنه شاف شبح
بصيت للتلاتة وقلت
\- إيه ده هو فيه اجتماع عائلي وأنا مش عارفة
كريم اتوتر وقال
\- ندى إحنا جايين نتكلم معاكي في موضوع مهم
قلتله
\- اتفضل قول
حسام بص لكريم وقال بصوت واطي
\- مش هنا يا كريم
لكن كريم كان خلاص فقد أعصابه
قاللي
\- إحنا جايين عشان عايزينك ترجعي معانا
عمر بصله باستغراب وقال
\- ترجع معاكو على فين بالظبط
