مخالفة مرور
روايات_مشيره_محمد
قلت له:
ـ بس إنت لسه ما خسرتش كل حاجة. ليلى معاك، ولسه عندك فرصة تثبت الحقيقة.
بص لي طويلًا، وبعدين قال:
ـ وإنتِ؟ ليه مهتمة بيا بالشكل ده؟ أنا فاهم إنك بتردي الجميل، لكن إنتِ مش مطالبة تشيلي همي.
ابتسمت.
ـ أنا مش شايلة همك عشان إنت أنقذتني وبس. أنا شايفة أب بيحاول يحمي بنته، وإنسان بيحاول يدافع عن الحقيقة. لكن لازم تعرف إن مساعدتي ليك هتفضل في حدود القانون، ومش هسمح إن علاقتنا الإنسانية تأثر على شغلي.
هز راسه باحترام.
ـ وده اللي خلاني أثق فيكي.
في اللحظة دي، سمعنا صوت مفتاح في الباب.
مروان قام بسرعة، ولما الباب اتفتح، ظهرت ست في أوائل التلاتينات، ملامحها جميلة لكن وشها مرهق، وعينيها فيها توتر واضح.
كانت داليا.
أول ما شافتني، وقفت مكانها.
ـ مين حضرتك؟
مروان رد بهدوء:
ـ دي الملازم أول آية عبد الرحمن. هي اللي ساعدتني أوصل ليلى للمستشفى يوم الميعاد.
داليا بصت لي من فوق لتحت، وبعدها قالت بحدة:
ـ وإيه اللي جابها بيتنا؟
مروان رد:
ـ دي زيارة عادية، وليلى بتحبها.
ضحكت بسخرية.
ـ زيارة عادية؟ وإنت بقيت تدخل ناس غريبة بيتك عادي كده؟
حاولت أحافظ على هدوئي.
ـ أنا مش جاية أتدخل في حياتكم يا مدام داليا. أنا جاية أزور ليلى، لأنها طلبت مني.
داليا بصت ناحية أوضة بنتها، وبعدها رجعت بصت لمروان.
ـ أنا عايزة أتكلم معاك لوحدنا.
مروان قال:
ـ اتفضلي.
لكن قبل ما أدخل في أي تفاصيل، قررت أستأذن.
ـ أنا هسيبكم تتكلموا، وأستأذن أنا.
مروان حاول يعترض، لكني أشرت له إني مش عايزة أكون سبب في خلاف بينهم.
وأنا خارجة، سمعت داليا بتقول بصوت منخفض لكنه واضح:
ـ إنت لسه مصر تدمر حياتنا عشان قضية ملهاش لازمة؟
وقفت للحظة، من غير ما ألتفت.
وسمعت مروان بيرد:
ـ القضية دي مش بتاعتي لوحدي يا داليا. فيه ناس اتظلمت، وفيه فلوس اتسرقت، وفيه أبرياء ممكن يدخلوا السجن بدل اللي عملوا الجريمة.
داليا ردت بعصبية:
ـ وأنا مالي بكل ده؟ أنا عايزة بنتي تعيش في أمان!
مروان قال بصوت حزين:
ـ وأنا كمان عايزها تعيش في أمان، بس الأمان مش معناه إننا نعيش خايفين ونسيب الغلط يكبر.
خرجت وقفلت الباب ورايا، لكن الكلام فضل يرن في ودني.
كان واضح إن داليا عارفة تفاصيل أكتر مما بتقول.
عدت الأيام، وبدأت القضية تتحرك من جديد.
المحامي قدم طلبات رسمية لفحص المستندات، ومراجعة سجلات التحويلات، والتحقق من توقيعات مروان.
